ផ្អើលថាមាន កាំភ្លើងធំ ឬកាំភ្លើងរថគ្រោះ នៅក្នុងទឹក ជ្រោះកាចាញ

ខេត្តរតនគិរីៈ នៅម៉ោង២រសៀល ថ្ងៃទី២៤ ខែមេសា ឆ្នាំ២០១២ មានការភ្ញាក់ផ្អើលមួយ នៅក្រុងបានលុង បន្ទាប់ក្រុម ស៊ីម៉ាក់ បានសន្និដ្ឋាន ជំហានដំបូងថា អាចនិងមានកាំភ្លើងធំ ឬកាំភ្លើងរថគ្រោះ កាលពីសម័យសង្គ្រាម ធ្លាក់លិចនៅក្នុង ទឹកជ្រោះកាចាយ ស្ថិតនៅសង្កាត់កាចាញ ក្រុងបានលុង ខេត្តរតនគិរី ប៉ុន្តែបន្ទាប់ពី ក្រុមសមត្ថកិច្ចជំនាញ យកឧបករណ៍ ទៅស្រង់បែជាឃើញ ទីបដែកដ៏ធំមួយ ។

ចៅសង្កាត់កាចាញ លោក ទុន ពៅ បានឲ្យដឹងថា ដំបូងឡើយក្រុម ស៊ីម៉ាក់ បានប្រាប់ថា នៅក្នុងទឹកជ្រោះកាចាញ អាចនឹងមានកាំភ្លើងធំ ឬកាំភ្លើងរថគ្រោះ លិចនៅក្នុងនោះ បន្ទាប់មកក្រុម ស៊ីម៉ាក់ ក៏បានយក ឧបករណ៍ទៅស្រង់ តែបែរជាឃើញ ទីបដែកទៅវិញ ហើយរហូតមកត្រឹមម៉ោង ១៥និង៣នាទី រសៀលថ្ងៃអង្គារ៍នេះ ទីបដែកដែលប្រទះឃើញ នៅមិនទាន់ស្រង់ចេញពី ទឹកជ្រោះកាចាញនោះទេ ។

លោក ទុន ពៅ ក៏បានឲ្យដឹងថា ទីបដែកនេះ មានទំហំប្រហែល២តឹក ឯប្រវែងនៅមិនទាន់ដឹងនោះទេ លោកក៏បានសន្និដ្ឋានថា ទីបដែកនេះ អាចជាបំពង់ សម្រាប់បូមទឹក ក្នុងរោងចក្រមួយ កាលពីសម័យ អណានិគម និយមបារាំង ។

មន្ត្រីស៊ើបអង្កេតអាដហុក ប្រចាំខេត្តរតនគិរី លោក ឆាយ ធី បានឲ្យដឹងថា ប្រជាពលរដ្ឋពីរនាក់ គឺលោក អ៊ុក ចាន់ធួក និងលោក ធួក សុខថេរ បានផ្តល់ព័ត៌មានកម្លាំងស៊ីម៉ាក់នៅថ្ងៃនេះ បន្ទាប់ពីអ្នកទេសចរណ៍ពីរនាក់ បានប្រាប់គាត់ថាមាន កាំភ្លើងនៅក្នុងទឹក នៅពេលដែលពួកគេបានមុជទឹក នៅក្នុងទឹកជ្រោះកាចាញនេះ ។

រហូតមកទល់ពេលនេះ បំពង់ទីបដែក សល់តាំងពីជំនាន់បារាំង ដែលដំបូងឡើយ ជាកាំភ្លើងធំ នៅមិនទាន់បានស្រង់ចេញពីទឹកនៅឡើយទេ ៕