ស្ទើរក្ស័យជីវិត ដោយសារតែ រថយន្ត កុងតឺន័រ កៀរម៉ូតូ ជាប់នឹងកង់

ភ្នំពេញៈ ម៉ូតូម៉ាកហុងដាសេ ១២៥ ស៊េរីឆ្នាំ២០០៨ ពាក់ស្លាកលេខព្រៃវែង 1C-2685 បណ្តើរទៅមុខ ស្ទើរមិនរួច ខណៈដែល ត្រូវរថយន្តសណ្តោងកុងតឺន័រ ពាក់ស្លាកលេខភ្នំពេញ 3A-5315 កិនពីលើ បណ្តាលឲ្យម្ចាស់ម៉ូតូ រងរបួសធ្ងន់សន្លប់ស្តូកស្តឹង កាលពីម៉ោង ១ និង ១០នាទី

រំលងអាធ្រាត្រ ឈានចូលថ្ងៃទី២៥ ខែមេសា ឆ្នាំ២០១២
នៅតាមបណ្តោយផ្លូវមុន្នីរ៉េត ខាងលិច អាងទឹកអូឡាំពិក ចម្ងាយប្រមាណជា ១០០ ម៉ែត្រ ស្ថិតនៅក្នុងសង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ។

មន្ត្រីនគរបាល ចរាចរណ៍ខណ្ឌចំការមន បាននិយាយថា បុរសម្នាក់រងរបួស សន្លប់ស្តូកស្តឹងនៅកន្លែងកើតហេតុ នឹងត្រូវ បានគេបញ្ជូន ទៅកាន់មន្ទីរពេទ្យ ដើម្បីសង្រោះអាយុជីវិត ។ មន្ត្រីដដែលបានបញ្ជាក់ថា ទាំងរថយន្ត និងម៉ូតូ ត្រូវបានកម្លាំង សមត្ថកិច្ច បញ្ជូនទៅកាន់ការិយាល័យ ចរាចរណ៍ផ្លូវគោក នៃស្នងការដ្ឋាននគរបាល រាជធានីភ្នំពេញ ដើម្បីដោះស្រាយ ទៅ តាមផ្លូវច្បាប់ ។

សាក្សីនៅកន្លែងកើតហេតុ បានឲ្យដឹងថា នៅពេលរំលងអាធ្រាត្រ គេបានឃើញម៉ូតូហុងដា បើកបរតាមបណ្តោយផ្លូវមុន្នីរ៉េត ស្របជាមួយរថយន្ត ក្នុងទិសដៅពីលិច ទៅកើត ខណៈនោះ ស្រាប់តែរថយន្តកុងទឺន័រ ប្រុងបត់ស្តាំ ក៏កិនម៉ូតូ បណ្តាលឲ្យរបួស មនុស្សតែម្តង។ ភ្លាមៗនោះ អ្នកបើកបររថយន្ត ក៏បានបើកទ្វារ រត់គេចខ្លួន ដោយបន្សល់ទុក តែជនរងគ្រោះ សន្លប់ស្តូកស្តឹង នៅលើចិញ្ចើមផ្លូវ ។

ប្រជាពលរដ្ឋ បានទទួចដល់សមត្ថកិច្ច ម្ចាស់ក្រុមហ៊ុន ឲ្យមានចំណាត់ការ ទៅលើអ្នកបើកបរ មិនគោរពច្បាប់ចរាចរណ៍ ពិសេស គឺរថយន្តប្រភេទធុនធំ ដូចជា រថយន្ត សណ្តោងកុងតឺន័រ រថយន្តដឹកដី រថយន្តដឹកខ្សាច់ និងរថ យន្ត ដឹកសំពីង សំពោងជាដើម៕