សមត្ថកិច្ចចុះបង្រ្កាប កន្លែងជួញដូរ និងចែកចាយ គ្រឿងញៀន នៅម្តុំសេរ៉ាតោន

ភ្នំពេញៈ ជនសង្ស័យ ពិតប្រាកដចំនួន ៤នាក់ ក្នុងនោះប្រុស ៣នាក់ និងស្រីម្នាក់ ត្រូវបាន កម្លាំង នគរបាលខណ្ឌ ដូនពេញ ធ្វើការឃាត់ខ្លួន បន្ទាប់ពីចុះឆែកឆេរ ផ្ទះមួយកន្លែង ដែលលួច លាក់ ចែកចាយគ្រឿងញៀន ហើយមនុស្ស ៣នាក់ផ្សេងទៀត ដែលសមត្ថកិច្ចរកឃើញថា មិនជាប់ពាក់ ព័ន្ធត្រូវបានដោះលែងវិញ។

ប្រតិបត្តិការចុះឆែកឆេរ បង្រ្កាបទីតាំងលួច ចែកចាយ និងប្រើប្រាស់គ្រឿងញៀន ខាងលើនេះ បាន ធ្វើឡើង កាលពី វេលាម៉ោងជាង ៣រសៀលថ្ងៃទី២៥ ខែមេសា ឆ្នាំ២០១២ ស្ថិតនៅក្រុមទី១៥៦ ភូមិ១២ សង្កាត់ស្រះចក ខណ្ឌ ដូនពេញ រាជធានីភ្នំពេញ។
អធិការរងនគរបាល ខណ្ឌដូនពេញ លោក ញ៉ែម សៅណុល បានប្រាប់មជ្ឈមណ្ឌល ព័ត៌មាន ដើម អម្ពិលថា កម្លាំង សមត្ថកិច្ចខណ្ឌដូនពេញ  ដោយមានការអនុញ្ញាត ពីព្រះ រាជអាជ្ញារង អមសាលាដំបូងរាជធានីភ្នំពេញ មាស ចាន់ពិសិដ្ឋ បានធ្វើការចុះបង្រ្កាបទីតាំងខាងលើ ដែលលួច ចែកចាយ និងប្រើប្រាស់គ្រឿងញៀន អស់រយៈពេលជាយូរមកហើយនោះ។
លោក ញ៉ែម សៅណុល បានបន្តថា ក្រោយពីការចុះឆែកឆេរ និងបង្រ្កាបទីតាំងខាងលើនេះ កម្លាំងសមត្ថកិច្ច របស់លោក បានធ្វើការឃាត់ខ្លួន ជនសង្ស័យចំនួន ៧នាក់ ប៉ុន្តែជាប់ពាក់ព័ន្ធពិតប្រាកដចំនួន ៤នាក់ ហើយ៣នាក់ផ្សេងទៀត ត្រូវបានដោះលែងទៅវិញ។
អធិការរងនគរបាលរូបនេះ បានបន្តថា ក្រោយការចុះឆែកឆេរ និងបង្រ្កាបទីតាំងខាងលើ សមត្ថកិច្ចរឹបអូសបាន គ្រឿងញៀនចំនួន ៣កញ្ចប់ និងឧបករណ៍ពាក់ព័ន្ធ មួយចំនួនទៀត។
ក្រោយពេលឃាត់ខ្លួនជនសង្ស័យទាំង ៤នាក់ខាងលើនេះ ត្រូវបានយកទៅឃុំខ្លួនបណ្តោះអាសន្ននៅអធិការដ្ឋាន នគរបាលខណ្ឌដូនពេញ ដើម្បីកសាងសំណុំរឿង បញ្ជូនទៅតុលាការ៕