ភ្នំពេញ ៖ ចៅក្រមស៊ើបសួរសាលា
ដំបូងរាជធានីភ្នំពេញ កាលពីរសៀលថ្ងៃ ទី១៩ ខែមករា ឆ្នាំ២០១៣
បានសម្រេច ឃុំខ្លួនបុរសម្នាក់ ដាក់ពន្ធនាគារបណ្ដោះ អាសន្ន
បន្ទាប់ពីតំណាងអយ្យការបាន ចោទប្រកាន់ពីបទហិង្សាដោយចេតនា
មានស្ថានទម្ងន់ ដែលមានចែងមាត្រា ២១៧ នៃក្រមព្រហ្មទណ្ឌ
ហើយទោសនេះ ត្រូវជាប់ពន្ធនាគារពី១ឆ្នាំទៅ៣ឆ្នាំ និង
ពិន័យជាប្រាក់មួយចំនួនទៀតប្រសិនបើ តុលាការស៊ើបរកឃើញថា
ជនត្រូវចោទ ពិតជាបានប្រព្រឹត្ដដូចការចោទប្រកាន់
ខាងលើនេះពិតប្រាកដមែន ។
ជនត្រូវចោទឈ្មោះអ៊ឹង ចំរើន ហៅ
ថ្លៃ ភេទប្រុស អាយុ២០ឆ្នាំ មានមុខ របរលក់ដូរ
ស្នាក់នៅផ្ទះលេខ១១០៣បេ ផ្លូវ៣៧១ ភូមិ-សង្កាត់ស្ទឹងមានជ័យ
ខណ្ឌមានជ័យ ត្រូវបានសមត្ថកិច្ចឃាត់ ខ្លួនកាលពីថ្ងៃទី១៧ ខែមករា
ឆ្នាំ២០១៣ វេលាម៉ោង១១ នៅចំណុចផ្លូវ៣៧១ ភូមិ ទ្រា៤
សង្កាត់ស្ទឹងមានជ័យ ខណ្ឌមានជ័យ។
ដើមហេតុដែលនាំឱ្យឃាត់ខ្លួន
នេះ កើតឡើងដោយសារតែនៅថ្ងៃទី៣១ ខែ តុលា ឆ្នាំ២០១២
វេលាម៉ោង៨យប់ បង ប្រុសរបស់ជនត្រូវចោទឈ្មោះអ៊ឹង តុលា
និងជនត្រូវចោទ ព្រមទាំងឈ្មោះរិទ្ធ និង ឈ្មោះភេវ
បានជិះម៉ូតូ២គ្រឿងរបស់អ៊ឹង ចំរើន និងរបស់ឈ្មោះរិទ្ធ
នាំគ្នាទៅផឹកស៊ី នៅអាហារដ្ឋានអង្គរភូមិន្ទ ។ ពេលផឹក ស៊ីរួច
ពួកគេដើរចេញក្រៅបម្រុងឡើង ជិះម៉ូតូ ស្រាប់តែក្រុមម្ខាងទៀតបាន
ទាញដៃរបស់ឈ្មោះអ៊ឹង ចំរើន បណ្ដាល ឱ្យដួលម៉ូតូ ពេលនោះអ៊ឹង
ចំរើន បាន ទាញកាំបិទភ្លាសសាច់ជ្រូក ដែលដាក់
តាមម៉ូតូស្រាប់កាប់ទៅលើភាគីម្ខាង ទៀតទាំងកំរោល រួចហើយអ៊ឹង
ចំរើន និងបក្ខពួកបានផ្ដួលម៉ូតូទុកចោល ហើយ រត់គេចខ្លួនតែម្ដង
។
លុះដល់ថ្ងៃទី១៧ ខែមករា ឆ្នាំ២០១៣
ដោយសារមានដីកាបញ្ជាឱ្យចូលខ្លួន លេខ០០៦អយឋ ចុះថ្ងៃទី៨ ខែមករា
ឆ្នាំ ២០១៣ របស់លោកសៀង សុខ តំណាង
អយ្យការអមសាលាដំបូងរាជធានីភ្នំពេញ
សមត្ថកិច្ចក៏បានចុះអនុវត្ដន៍តាមដីកា នៅចំណុចផ្លូវលេខ៣៧១
ភូមិទ្រា៤ សង្កាត់ ស្ទឹងមានជ័យ ខណ្ឌមានជ័យ ក៏បានឃាត់
ខ្លួនឈ្មោះអ៊ឹង ចំរើន តាមដីកាតែម្ដង
ដើម្បីបញ្ជូនទៅកាន់សាលាដំបូង ។
