បន្ទាប់ពីសមត្ថកិច្ចជំនាញគ្រប់ជាន់ថ្នាក់
បានដកខ្លួនចេញអស់ពីបរិវេណធនាគារ អេស៊ីលីដា សាខាផ្សារបែកអន្លូង
ស្រុកស្ទឹងត្រង់ ខេត្តកំពង់ចាម រហូតមកដល់ម៉ោង ៦និង ៣០ នាទី
ព្រលប់ថ្ងៃទី២៣ ខែមករា ឆ្នាំ២០១៣
គេពុំទាន់ឃើញក្រុមចោរចេញពីក្នុងធនាគារ ដើម្បីរត់គេចខ្លួននោះទេ
តែបែរជាចោរ សុំថ្នាំញៀនមួយកញ្ចប់ថែមទៀតទៅវិញ។
ចំណែកឯក្រុមអ្នកយកព័ត៌មានជាច្រើននាក់
កំពុងតែនៅរង់ចាំនៅខាងក្រៅដែលមានចំងាយឆ្ងាយ
ដើម្បីមើលពីសកម្មភាពរបស់ក្រុមចោរផងដែរ។
ជាមួយហេតុការណ៍
នេះ ត្រូវបានប្រភព បង្ហើបឲ្យដឹងថា ទោះជាសមត្ថកិច្ចជំនាញ
បានដកថយអស់ និងទុកឱកាសឲ្យចោររត់មែន
ប៉ុន្តែនៅមានកម្លាំងសំងាត់ពិសេសមួយចំនួន នៅពូនសម្ងំលាក់ខ្លួន
ដើម្បីឃ្លាំមើលដំណើររបស់ក្រុមចោរញៀនថ្នាំ។
នៅវេលាម៉ោង ៦ និង
៥០ នាទី យប់នេះ ក្រុមចោរបានទាមទាររកថ្នាំញៀន ដើម្បីជក់បន្ថែមទៀត
ព្រោះជាតិញៀនរើឡើង ធ្វើទុក្ខខ្លាំង។ ក្នុងពេលនោះ សមត្ថកិច្ច
បានប្រគល់ថ្នាំញៀនប្រភេទម៉ាទឹកកក ចំនួនមួយកញ្ចប់ រួមជាមួយដែកកេស
ឧបករណ៍ជក់ថ្នាំមួយកំប្លេ។
សូមបញ្ជាក់ថា កាលពីវេលាម៉ោងជាង ១១ ព្រឹក
ថ្ងៃទី២៣មករានេះ សមត្ថកិច្ចបានប្រគល់ថ្នាំញៀន ឲ្យចោរម្តងហើយ
ចំនួនមួយកញ្ចប់ ហើយដល់ពេលព្រលប់នេះ ក្រុមចោរបានទារថ្នាំញៀនមួយកញ្ចប់ទៀត
ហើយសមត្ថកិច្ចក៏ព្រមឲ្យតាមការស្នើសុំរបស់លោកចោរ។
ដោយសារខ្លាច
ជនល្មើសបាញ់សម្លាប់ចំណាប់ខ្មាំងទាំង ២នាក់នោះ សមត្ថកិច្ចទាំងអស់
ទាំងកងរាជអាវុធហត្ថ ប៉ូលិសខេត្តកំពង់ចាម និងប៉ូលិសប្រឆាំងភេរវកម្ម
របស់អគ្គស្នងការដ្ឋាននគរបាលជាតិ បានដកចេញទាំងស្រុងពីធនាគារ អេស៊ីលីដា
សាខាផ្សារបែកអន្លូង ស្រុកស្ទឹងត្រង់ ខេត្តកំពង់ចាម
កាលពីវេលាល្ងាចថ្ងៃទី២៣ ខែមករា ឆ្នាំ២០១៣។
ការដកចេញកម្លាំង
សមត្ថកិច្ចទាំងអស់ ដោយសារមន្ត្រីជំនាញ
បានប្រជុំពិភាក្សាគ្នាជាច្រើនលើកច្រើនសារ
ដើម្បីដាក់ផែនការបាញ់គ្រាប់ផ្សែង និងថ្នាំពុល ចូលក្នុងបន្ទប់បេឡា
ដែលចោរ ចាប់ចំណាប់ខ្មាំង ពួនលាក់ខ្លួននោះ
ប៉ុន្តែសមត្ថកិច្ចបានលើកហេតុផលថា ថ្នាំពុលនោះ
មិនអាចធ្វើក្រុមចោរសន្លប់ បានលឿន ដូចការគ្រោងទុកនោះទេ
ព្រោះទាល់តែប្រើពេលយូរបន្តិច ទើបសន្លប់ ហើយចន្លោះពេលនោះ ក្រុមចោរ
អាចឆ្លៀតឱកាស បាញ់សម្លាប់ចំណាប់ខ្មាំង។
យ៉ាងណាក៏ដោយ
សមត្ថកិច្ចបានសម្រេចចិត្តថា នឹងដកខ្លួនថយចេញពីកន្លែងកើតហេតុ
ហើយទុកឲ្យក្រុមចោររត់គេចខ្លួន ដោយខ្លួនឯង
ជៀសវាងការគ្រោះថ្នាក់ដល់ចំណាប់ខ្មាំង។
សូមបញ្ជាក់ថា
មកដល់រសៀលម៉ោង ៣ និង ៣០ នាទី ថ្ងៃទី២៣ ខែមករា ឆ្នាំ២០១៣
ប៉ូលិសជំនាញជាង ២០ នាក់ ដឹកនាំដោយលោកឧត្តមសេនីយ៍ត្រី ចាន់ ស៊ីថា
ប្រធាននាយកដ្ឋាននគរបាលប្រឆាំងភេរវកម្ម
នៃអគ្គស្នងការដ្ឋាននគរបាលជាតិ បានចុះទៅពីភ្នំពេញ
ដើម្បីជួយអន្តរាគមន៍ ជាមួយប៉ូលិសខេត្តកំពង់ចាម
ក្នុងករណីក្រុមចោរញៀនថ្នាំ ចាប់ជំរិតបុគ្គលិក នៅក្នុងធនាគារ អេស៊ីលីដា
សាខាផ្សារបែកអន្លូង ស្រុកស្ទឹងត្រង់ ខេត្តកំពង់ចាម។
កាលពី
វេលាម៉ោងជាង ១ រសៀល ថ្ងៃទី២៣ ខែមករា ឆ្នាំ២០១៣ គេបានរៀបចំលុយចំនួន ៥៧
លានរៀល ដាក់ក្នុងកាបូប ដើម្បីប្រគល់ឲ្យក្រុមចោរប្លន់
ជាថ្នូនឹងការដោះលែងបុគ្គលិករបស់ខ្លួន ២ នាក់
ដែលនៅក្នុងកណ្តាប់ដៃក្រុមចោរ។ ប៉ុន្តែលុយដ៏ច្រើនសន្ធឹកសន្ធាប់នោះ
មិនឋិតនៅក្នុងក្រសែភ្នែករបស់ក្រុមចោរប្លន់ញៀនថ្នាំនោះទេ
គឺពួកវាទាមទារយកតែថ្នាំញៀនប៉ុណ្ណោះ។
ចំណែកឯឪពុកម្តាយរបស់
ជនរងគ្រោះទាំង ២នាក់
បានសុំអង្វរឲ្យសមត្ថកិច្ចធ្វើយ៉ាងណាប្រើឲ្យអស់ជំនាញរបស់ខ្លួន
ដើម្បីរំដោះកូនពួកគាត់ ចេញពីកណ្តាប់ក្រុមចោរ។
ជាមួយគ្នា
នោះដែរ ប្រជាពលរដ្ឋជាច្រើន បាននាំគ្នាឈរមើលហេតុការណ៍នេះដែរ
ថាតើសមត្ថកិច្ចអាចដោះស្រាយបញ្ហានេះ បានដោយសន្តិវិធី ឬយ៉ាងនោះ?
ព្រោះអីចោរជាមនុស្សញៀនថ្នាំ និងមានកាំភ្លើងខ្លីមួយដើម
នៅក្នុងដៃផងដែរ។
សូមបញ្ជាក់ថា កាលពីម៉ោង ១០ និង ៥០ នាទី
ព្រឹកថ្ងៃទី២៣ ខែមករា ឆ្នាំ២០១៣ ក្រុមចោរចាប់ជំរិតម្នាក់
បាននិយាយទូរស័ព្ទឆ្លងឆ្លើយជាមួយសមត្ថកិច្ច ដោយបានប្រាប់ថា
ក្រុមចោរបានបាញ់សម្លាប់គ្នាឯងម្នាក់ហើយ ដោយសារតែបក្ខពួកចោរនោះ
បានក្បត់នឹងបក្ខពួកខ្លួន។ ប៉ុន្តែហេតុការណ៍ ដែលអះអាងថា ចោរបាញ់នោះ
គេមិនបានឮសំឡេងផ្ទុះអាវុធ នៅក្នុងធនាគារអេស៊ីលីដា
សាខាផ្សារបែកអន្លូង ស្រុកស្ទឹងត្រង់ ខេត្តកំពង់ចាម នោះទេ។
ជាមួយករណីបាញ់នោះ មន្ត្រីធនាគារអេស៊ីលីដាម្នាក់
ដែលនិយាយក្នុងលក្ខខណ្ឌ សុំមិនបញ្ចេញឈ្មោះ បានឲ្យដឹងថា
ក្រុមចោរបានចាប់បុគ្គលិក ២នាក់ ដាក់ក្នុងបន្ទប់បេឡា
(កន្លែងទុកលុយ) ដែលមានសោសុវត្ថិភាពពីរជាន់
ហើយបន្ទប់ធ្វើយ៉ាងពិសេស មិនមានសំឡេងឮ ចេញមកខាងក្រៅទេ
ទោះជាមានហេតុការណ៍អ្វីកើតឡើងក៏ដោយ។
ក្នុងហេតុការណ៍នេះ
គេឃើញមានវត្តមានលោកឧត្តមសេនីយ៍ត្រី ឆាយ គឹមសុន
ស្នងការនគរបាលខេត្តកំពង់ចាម និងលោកឧត្តមសេនីយ៍ត្រី វ៉ា សារិទ្ធ
មេបញ្ជាការកងរាជអាវុធហត្ថខេត្តកំពង់ចាម រួមជាមួយមន្ត្រីក្រោមឱវាទ
សមត្ថកិច្ចពាក់ព័ន្ធរាប់រយនាក់ ព្រះរាជអាជ្ញា ចេញមកអន្តរាគមន៍ផងដែរ។
ប៉ុន្តែការឡោមព័ទ្ធរបស់សមត្ថកិច្ចជុំវិញធនាគារអេស៊ីលីដា
ដើម្បីចាប់ចោរប្លន់នោះ គឺពុំមានលទ្ធផលនៅឡើយទេ
ព្រោះក្នុងដៃចោរមានចំណាប់ខ្មាំងចំនួន ២នាក់នៅឡើយ។
ជនរងគ្រោះ២នាក់ដែលចោរកំពុងចាប់ជាចំណាប់ខ្មាំង ឈ្មោះស៊ិន គឹមថាន
ភេទប្រុស អាយុ៣៥ឆ្នាំ ស្នាក់នៅភូមិព្រែកបារាំង ឃុំព្រៃកក់
ស្រុកស្ទឹងត្រង់ ខេត្តកំពង់ចាម និងឈ្មោះ ទីន គុយហេង ភេទប្រុស អាយុ
២៦ឆ្នាំ ស្នាក់នៅភូមិព្រែកតាអង្គ ឃុំព្រៃកក់ ស្រុកស្ទឹងត្រង់
ខេត្តកំពង់ចាម ចំណែកជនរងគ្រោះដែលរត់រួច ចេញពីកណ្តាប់ដៃចោរ ឈ្មោះ
ម៉ាត លី ភេទប្រុស អាយុ ២៤ឆ្នាំ ស្នាក់នៅស្រុកជើងព្រៃ។
ហេតុការណ៍នេះ បានកើតឡើងតាំងពីល្ងាចថ្ងៃទី២២ ខែមករា ឆ្នាំ២០១៣
ស្ថិតនៅក្នុងធនាគារអេស៊ីលីដា សាខាផ្សារបែកអន្លូង ក្នុងភូមិបែកអន្លូង
ឃុំអារក្សត្នោត ស្រុកស្ទឹងត្រង់ ខេត្តកំពង់ចាម
ហើយមកដល់វេលាម៉ោង៥ល្ងាចថ្ងៃទី២៣មករានេះ
ក្រុមសមត្ថកិច្ចពុំទាន់ធ្វើការបង្ក្រាបក្រុមចោរបាននៅឡើយទេ
ហើយថែមទាំងដកខ្លួនថយ បើកដៃឲ្យចោររត់ទៀតផង៕ (CEN)
