សាកសពជនរងគ្រោះ ពេលនៅក្នុងបន្ទប់លេខ២៣ នៃផ្ទះសំណាក់ សាន់សេតហ្គាដិនN2
បុគ្គលិកពេទ្យចំការចេក ឬពេទ្យបង្អែកខេត្តព្រះសីហនុ បានរាយការណ៍មកថា មានគេរំដោះយកសាកសពបុរសជនជាតិរុស្ស៊ីម្នាក់ មកទុកចោលនៅសាលខ្មោចចំនួនពីយប់បីថ្ងៃហើយ ឥឡូវនេះមានអាការៈធំក្លិនស្អុយអាសោចសម្បើមណាស់ នៅមិនទាន់ឃើញមានស្ថានទូត ឬក្រុមគ្រួសារមកទទួលនៅឡើយទេ។
បុគ្គលិកពេទ្យទាំងនោះ បាននិយាយថា សាកសពនេះ ត្រូវបានសមត្ថកិច្ចប៉ូលិសជំនាញឃុបឃិតគ្នាជាមួយម្ចាស់ផ្ទះសំណាក់ ដឹកចេញយកមកទុកចោលនៅសាលខ្មោចនេះ យ៉ាងប្រញ៉ាប់ប្រញ៉ាល់តាំងពីថ្ងៃទី១៥ ខែមករា ឆ្នាំ២០១៣ មកម្ល៉េះ រហូតមកដល់ពេលល្ងាចថ្ងៃទី១៦មករានេះ នៅមិនឃើញមានក្រុមគ្រួសារ ឬស្ថានទូតមកទទួលយកទៅទេ។
លោក សេង ណុង ប្រធានមន្ទីរពេទ្យបង្អែកខេត្តព្រះសីហនុ បាននិយាយប្រាប់នៅរសៀលថ្ងៃទី១៦ ខែមករា ឆ្នាំ២០១៣ នេះថា សាកសពបុរសជនជាតិរុស្ស៊ីវ័យចំណាស់ម្នាក់នេះ ត្រូវបានប៉ូលិសគេយកមកទុកចោលនៅសាលខ្មោចនេះ នៅមិនទាន់ដឹកយកទៅណានោះទេ ឥឡូវនេះគាត់មិនដឹងជាគិតបែបណានោះទេ។
សូមបញ្ជាក់ថា នៅក្នុងរបាយការណ៍ប៉ូលិសក្រុងព្រះសីហនុ បានឲ្យដឹងថា ជនរងគ្រោះមានឈ្មោះ MUKHAMEDZANOV YURY អាយុ៥៩ឆ្នាំ ជនជាតិរុស្ស៊ី កាន់លិខិតឆ្លងដែនលេខ ៧១១១៣៣៦៦២។ ជនរងគ្រោះបានស្លាប់នៅក្នុងបន្ទប់លេខ២៣ នៃផ្ទះសំណាក់សាន់សេតហ្កាដិនN2 ស្ថិតនៅក្នុងក្រុមទី២៤ ភូមិ៣ សង្កាត់លេខ៣ ក្រុងព្រះសីហនុ កាលពីថ្ងៃទី១៥ ខែមករាឆ្នាំ២០១៣។
ដោយមានការសន្និដ្ឋានជាជំហានដំបូងថា ជនរងគ្រោះស្លាប់ដោយសារជំងឺគាំងបេះដូង៕(CEN)
