ភ្នំពេញ ៖
សហជីពសេរីកម្មករនៃព្រះរាជាណាចក្រកម្ពុជា
នៅថ្ងៃអង្គារ៍ដើមសប្តាហ៍នេះ
បានចេញមុខប្តឹងនាយកក្រុមហ៊ុនទូរស័ព្ទចល័តមួយទៅក្រសួងការងារដោយ
ចោទប្រកាន់ថា ក្រុមហ៊ុននេះមិនបានគោរពច្បាប់ការងារ ។ការដាក់ពាក្យបណ្តឹងនេះបានកើត មានឡើង ក្រោយពីតំណាងបុគ្គលិកទូរស័ព្ទចល័ត Mfone ប្រមាណ២៥នាក់ ដែលតំណាងឲ្យបុគ្គលិកសរុប៥៤នាក់ បានមកដាក់ពាក្យបណ្តឹងនៅការិយាល័យរបស់សហជីពសេរីកម្មករដោយសារតែ ក្រុមហ៊ុនបានបញ្ឈប់បុគ្គលិកដោយគ្មានហេតុផល។
ពាក្យបណ្តឹងមួយ ច្បាប់របស់សហជីពសេរីកម្មករដាក់ទៅក្រសួងការងារបាន ចោទប្រកាន់ថា នាយកក្រុមហ៊ុនMfoneបានព្យួរការងារបុគ្គលិកដោយពុំបានផ្តល់ប្រាក់ បៀវត្សឡើយ ចាប់តាំងពីខែវិច្ឆកាឆ្នាំ២០១២រហូតមកដល់ខែមករាឆ្នាំ២០១៣។
ពាក្យបណ្តឹងដដែលបានចោទប្រកាន់ថា ក្រុមហ៊ុនមានចេតនាបញ្ឈប់បុគ្គលិកទាំងនោះ ដោយពុំបានផ្តល់អត្ថប្រយោជន៍ផ្សេងៗទៅតាមច្បាប់ស្តីពីការងារទេ។
លោកស្រីសំ ស្រីមុំ អគ្គលេខាធិការរងនៃសហជីពសេរីកម្មករ បាននិយាយថា សហជីពចង់ឲ្យក្រុមហ៊ុនទទួលកម្មករចូលធ្វើការវិញ។ លោកស្រីនិយាយថា«ប្តឹងទាមទារឲ្យក្រុមហ៊ុន ទីមួយ ទទួលពួកគាត់ចូលធ្វើការវិញ។ ទីពីរបើក្រុមហ៊ុនមិនទទួលពួកគាត់ចូលធ្វើការទេ ក្រុមហ៊ុនត្រូវតែទូទាត់ស្តីពីច្បាប់ការងារ»។
កាលពីដើមខែវិច្ឆកាឆ្នាំ២០១២ ក្រុមហ៊ុនទូរស័ព្ទចល័តMfone បានផ្អាកការងារបុគ្គលិកបម្រើផ្នែកអតិថិជន ដែលភាសារអង់គ្លេសហៅថា Tele Marketing ប្រមាណជិត១០០នាក់ ដោយលើកហេតុផលថា កម្ពុជាកំពុងរៀបចំកិច្ចប្រជុំកំពូលអាស៊ាន។
អ្នកស្រី ភុន កែវពិសិដ្ឋ អាយុ២៨ ដែលបានបម្រើការងារនៅក្រុមហ៊ុនMfoneប្រមាណជាង៤ឆ្នាំ បាននិយាយថា ពួកគេបានព្យាយាមទៅជួបក្រុមហ៊ុនដើម្បីឲ្យបានការងារត្រឡប់មកវិញ តែត្រូវបានខាងតំណាងក្រុមហ៊ុនបដិសេធ ។ អ្នកស្រីឲ្យដឹងថា កម្មករចង់ទាមទារឲ្យក្រុមហ៊ុនទទួលពួកគេឲ្យចូលធ្វើការវិញ និងទាមទារប្រាក់សំណងទៅតាមអតីតភាពការងារ ។
អ្នកស្រីនិយាយថា «ដូចថា វាអត់សម! តាមធម្មតាក្រុមហ៊ុនត្រូវជូនដំណឹងមុន យ៉ាងតិចក៏មួយខែដែរ។ ប៉ុន្តែនេះអត់មានទេ។ គេប្រាប់ពួកខ្ញុំថ្ងៃហ្នឹង ផ្អាកពួកខ្ញុំថ្ងៃហ្នឹង ហើយអត់មាននិយាយថ្ងៃចូលវិញទេ។ កាលពីមុន គាត់និយាយថា គាត់ផ្អាកតែកន្លះខែ ឬក៏តែមួយខែទេ។ គាត់ថា យ៉ាងណាគាត់ទាក់ទងមកខាងពួកខ្ញុំ។ ក៏ប៉ុន្តែអត់មានទេ។ លើសពីមួយខែហើយ ពុំមានទាក់ទងមកទេ»។
ក្រុមហ៊ុនទូរស័ព្ទចល័ត Mfone មិនអាចស្នើសុំដើម្បីទំនាក់ទំនងបានទេ។នៅពេលទាក់ទងតាម ទូរស័ព្ទខ្សែរបស់ក្រុមហ៊ុន អ្នកលើកទូរស័ព្ទសុំមិនធ្វើអត្ថាធិប្បាយទេ។ ក្រុមហ៊ុនទូរស័ព្ទចល័ត Mfone បានដំណើរការចាប់តាំងពីឆ្នាំ១៩៩០ ដោយបានចុះកិច្ចសន្យាជាមួយក្រសួងប្រៃសណី និងទូរគមនាគមន៍រយៈពេល៣៥ឆ្នាំ។ ក្រុមហ៊ុននេះមានបណ្តាញខ្សែទូរស័ព្ទចល័តជាច្រើនខ្សែ ដូចជាប្រព័ន្ធ០១១ , ០៩៩, ០៨៥, ០៧៦ និង០៦១៕
