បុរសដែលគជឿថា ជាប់សង្ស័យករណីវាយប្រពន្ធ ស្លាប់ ដោយសារខឹងប្រពន្ធ ផឹកស្រាប្រមឹករាល់ថ្ងៃ ហើយនិយាយមិនស្តាប់ ត្រូវបានប៉ូលិសព្រហ្មទណ្ឌខេត្តក្រចេះ បានចាប់ខ្លួន កាលពីថ្ងៃទី១៤ ខែមករា ឆ្នាំ២០១៣ ទីលំនៅចំណុចអូរស្វាន ភូមិកំពង់ភ្នៅ ឃុំកោះខ្ញែរ ស្រុកសំបូរ។
ប៉ូលិសចាប់ខ្លួនបុរសម្នាក់សង្ស័យថា វាយប្រពន្ធស្លាប់ដោយសារខឹង មិនព្រមឈប់ផឹកស្រា
លោក ហួត លឹមហ៊ាង នាយរងការិយាល័យនគរបាលការិយាល័យព្រហ្មទណ្ឌកំរិតធ្ងន់ខេត្តក្រចេះ បានឲ្យដឹងថា ជនសង្ស័យ ឈ្មោះ លី រត្ន័ អាយុ ៤៧ឆ្នាំ ជាអ្នកនេសាទ។ រីឯស្ត្រីជាប្រពន្ធដែលស្លាប់ឈ្មោះ សៀម មុំ អាយុ ៤៥ឆ្នាំ មានទីលំនៅចំណុចអូរស្វាន ភូមិកំពង់ភ្នៅ ឃុំកោះខ្ញែរ ស្រុកសំបូរ។ មានកូន ចំនួន ៧នាក់ ស្នាក់នៅក្នុងបន្ទុកពីរនាក់។
លោក ហួត លឹមហ៊ាង បានឲ្យដឹងទៀតថា កាលពីថ្ងៃទី៩ ខែមករា ឆ្នាំ២០១៣ បុរសជាប់ចោទបានវាយទៅលើប្រពន្ធដោយទះកំផ្លៀង ហើយវាយនឹងឈ្នុលឫស្សី សម្រាប់ជួសមង ខណៈដែលខឹងនឹងស្ត្រី ជាប្រពន្ធ មិនឈប់ផឹកស្រា ប្រមឹកជាប្រចាំ។ ក្រោយពីកើតហិង្សារួច បានបីថ្ងៃស្ត្រី ជាប្រពន្ធ បានស្លាប់នៅលើផ្ទះ។
ប៉ូលិសបានឲ្យដឹងទៀតថា បន្ទាប់ពីស្ត្រីជាប្រពន្ធ បានស្លាប់ ប៉ូលិសក៏បានចាប់ឃាត់ខ្លួន បុរសជាប្តីមកកាន់ការិយាល័យ ដើម្បីសាកសួរ និងកសាងសំណុំរឿង។
ជនសង្ស័យ លី រ័ត្ន បានប្រាប់ប៉ូលិសថា កន្លងមកប្រពន្ធរបស់ខ្លួន ជាមនុស្សប្រមឹក ស្រវឹងរៀងរាល់ថ្ងៃ ខ្លួនបានណែនាំគ្រប់វិធី នៅតែមិនឈប់ លុះដល់ថ្ងៃកើតហេតុ ម៉ោង ១០ព្រឹក ពេលហូបថ្ងៃត្រង់រួច ប្រពន្ធរបស់ខ្លួន មានធុំក្លិនស្រា ខ្លួនក៏សួរនាំ រហូតដល់ខ្លួន វាយលើប្រពន្ធ ហើយទាញយកឈ្នុល ធ្វើពីឫស្សី វាយទៅលើដងខ្លួន និងជើង តែមិនបណ្តាលឲ្យចេញឈាម ឬសន្លប់នោះទេ។
ជនសង្ស័យរូបនោះ បាននិយាយទៀតថា ពេលវាយប្រពន្ធរួចហើយនោះ ខ្លួនបានដើរចេញ រហូតដល់ល្ងាច ត្រឡប់មកផ្ទះវិញ ប្រពន្ធរបស់ខ្លួន បានយកសាច់ក្របី ដែលប្អូនឲ្យ មកស្ងោហូបទាំងអស់គ្នា លុះមកដល់ថ្ងៃទី១២ ខែមករា ឆ្នាំ២០១៣ វេលាម៉ោងប្រហែល ១២ រំលងអធ្រាត្រ ប្រពន្ធរបស់គាត់ ដកដង្ហើមថប់ៗ ខ្លួនក៏ស្ទុះទៅលើករឹតទ្រូង ស្រាប់តែប្រពន្ធរបស់ខ្លួន ដកដង្ហើមខ្សោយទៅៗ រហូតដល់ស្លាប់ ក្នុងខ្ទមស្រែ ក្នុងព្រៃតែម្តងទៅ៕(CEN)
