 |
| លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ |
ពេញមួយខែមករានេះគឺជារយៈពេលដែល មន្ត្រីដែលជាប់កាតព្វកិច្ចក្នុងច្បាប់អំពើពុករលួយទាំងអស់ជិត៣ម៉ឺន នាក់ត្រូវចូលខ្លួនទៅប្រកាសទ្រព្យសម្បត្តិនៅឯអង្គភាពប្រឆាំង អំពើពុករលួយក្នុងដំណាក់កាលទី២ ។ គិតត្រឹមថ្ងៃទី១១ មករា មានមន្ត្រីចំនួនជាង ៣០០០ នាក់បានចូលទៅប្រកាសទ្រព្យសម្បត្តិរួចហើយ។ យុទ្ធនាការប្រកាសទ្រព្យសម្បត្តិនឹងបន្តធ្វើរហូតដល់ថ្ងៃទី ៣១ មករា។
អង្គភាពប្រឆាំងអំពើពុករលួយបានបើកទ្វារ ចាប់តាំងពីថ្ងៃទី១ មករាមក ដើម្បីឲ្យមន្ត្រីជាប់កាតព្វកិច្ចទាំងអស់ ទៅប្រកាសទ្រព្យ សម្បត្តិ និងបំណុលរបស់ខ្លួន។ ការបើកទ្វារទទួលអ្នកចូលខ្លួន ទៅប្រកាសទ្រព្យសម្បត្តិនិងបំណុល នេះ បានធ្វើឡើងបន្ទាប់ពីអង្គភាពនេះបានប្រកាសជូនដំណឹងដល់បុគ្គល ជាប់កាតព្វកិច្ចទាំងអស់ ឲ្យបានដឹងកាលពីថ្ងៃទី១ ខែ មករា។គិតត្រឹមថ្ងៃទី១១ ខែមករា ឆ្នាំ២០១៣ នេះ មានមន្ត្រីរដ្ឋាភិបាលចំនួនជាង ៣.២០០ នាក់ហើយដែលបានចូលខ្លួនទៅប្រកាសទ្រព្យសម្បត្តិ និងបំណុលនៅចំពោះ មុខអង្គភាពប្រឆាំងពុករលួយ។ នេះបើយោងតាមការប្រកាសឲ្យដឹង របស់អង្គភាពប្រឆាំងអំពើពុករលួយ។
លោក ឃុន រតនា ប្រធាននាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយ បានបញ្ជាក់ក្នុងសេចក្តីប្រកាសព័ត៌មានកាលពីថ្ងៃទី៩មករាថា ការប្រកាសទ្រព្យសម្បត្តិ និងបំណុលជាលើកទី២ បានដំណើរការ ចាប់ពីថ្ងៃទី០១ដល់ថ្ងៃទី៣១ មករា។ ក្នុងអំឡុងពេលពេញមួយខែ មករានេះ អង្គភាពប្រឆាំងអំពើពុករលួយ បានបើកធ្វើការរៀងរាល់ថ្ងៃ រាប់ទាំង ថ្ងៃសៅរ៍អាទិត្យ ដោយគ្មានការឈប់សម្រាកឡើយ ចាប់ពីម៉ោង៨ព្រឹក រហូតដល់ម៉ោង៥រសៀល។
យោងតាមច្បាប់ប្រឆាំងអំពើពុករលួយ ការប្រកាសទ្រព្យសម្បត្តិ និងបំណុលត្រូវធ្វើឡើងរៀងរាល់ពីរឆ្នាំម្តង។ អ្នកដែលជាប់កាតព្វកិច្ចត្រូវប្រកាសទ្រព្យសម្បត្តិរួមមាន មន្ត្រីរាជការស៊ីវិលដែលមានឋានៈចាប់ពីប្រធាននាយកដ្ឋានឡើងទៅ មន្ត្រីប្រដាប់អាវុធដែលមានឋានៈចាប់ពីវរៈសេនីយឯក និងក្រៅពីនោះ សមាជិកក្រុមប្រឹក្សារាជធានី-ខេត្ត ស្រុក-ខណ្ឌ និងឃុំ-សង្កាត់ សមាជិកព្រឹទ្ធសភា រដ្ឋសភា ព្រមទាំងមន្ត្រីតុលាការផង ក៏ត្រូវប្រកាសទ្រព្យសម្បត្តិរបស់ខ្លួនដែរ។ អ្នកដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុលទាំងអស់មានសរុបជិត ៣ម៉ឺននាក់។
ក្នុងឱកាសប្រារព្ធទិវាប្រឆាំងអំពើពុករលួយកាលពីថ្ងៃទី៩ ធ្នូ ឆ្នាំ២០១២ លោកឱម យ៉ិនទៀង ប្រធានអង្គភាពប្រឆាំងអំពើពុករលួយបានប្រកាសថា ឆ្នាំ២០១៣ នេះគឺជាឆ្នាំនៃការប្រយុទ្ធប្រឆាំងអំពើពុករលួយដ៏សកម្មថែមទៀត។ ការប្រកាសទ្រព្យសម្បត្តិគឺជាផ្នែកមួយនៃការប្រយុទ្ធប្រឆាំងនឹង អំពើពុករលួយ ប៉ុន្តែការប្រកាសទ្រព្យសម្បត្តិនិងបំណុលដែលធ្វើឡើងដោយសម្ងាត់ ត្រូវបានមតិមួយចំនួនរិះគន់ថា នឹងធ្វើឲ្យការប្រយុទ្ធប្រឆាំងអំពើពុករលួយ មិនសូវមានប្រសិទ្ធភាព ឡើយ៕(rfi)
