ខេត្តកំពង់ស្ពឺ ៖
ព្រះសង្ឃ១អង្គត្រូវបានប្រទះឃើញចងកសម្លាប់ខ្លួននៅនឹងដើមក្រសាំង
កាលពីវេលាម៉ោងជាង១៧ល្ងាច ថ្ងៃទី២៤ ខែមីនា ឆ្នាំ២០១៣
ស្ថិតភូមិត្បូងបឹង ឃុំស្រង់ ស្រុកគងពិសី ខេត្តកំពង់ស្ពឺ ។ ប្រភពពីសមត្ថកិច្ចប្រាប់ឱ្យដឹង ថា ព្រះសង្ឃដែលចងកសម្លាប់ខ្លួនឈ្មោះ ម៉ែន វិន ភេទប្រុស អាយុ២៤ឆ្នាំ ជាព្រះសង្ឃបួសនៅប្រទេសថៃ ទើបត្រឡប់មកស្រុកំណើតវិញរយៈពេល៣-៤ថ្ងៃនេះប៉ុណ្ណោះ ។
ប្រភព័ត៌មានពីសាច់ញាតិបាន ប្រាប់ឱ្យដឹងថា ព្រះតេជគុណជាកូនកំព្រាឪពុកម្តាយ ហើយបានចាកចេញពីស្រុកកំណើតអស់រយៈពេលជាច្រើនឆ្នាំ ទៅបួសជាព្រះនៅក្នុងប្រទេសថៃបាត់ ហើយឃើញត្រឡប់មកវិញ ស្នាក់នៅជាមួយបងប្អូន ក្នុង ក្រុងច្បារមន ។ ប្រភពបានបន្តថា ក្រោយពីត្រឡប់ពីប្រទេសថៃ ព្រះតេជគុណហាក់មានសតិខុសប្រក្រតី ចេះតែនិយាយថាខ្លួនបានធ្វើខុស មិនចង់រស់នៅទេ ចង់តែស្លាប់ ហើយបានបាត់ខ្លួននៅថ្ងៃទី២៣ ខែមីនា លុះពេលយប់បានទូរស័ព្ទប្រាប់សាច់ញាតិថា គេចង់តែសម្លាប់ខ្លួន ព្រោះបានប្រព្រឹតខុស តែមិនបានបញ្ជាក់ប្រាប់ថា ខុសអ្វីនោះទេ ស្រាប់ដល់ល្ងាចថ្ងៃទី២៤ ខែមីនា ត្រូវបានប្រទះឃើញចង.ក នឹងដើមក្រសាំងនៅជាប់ជើងភ្នំស្រង់តែម្តង ។
សមត្ថកិច្ចនគរបាលបានប្រាប់ថា ព្រះសង្ឃរងគ្រោះបានយកសំពត់ ចង.កលើដើមក្រសាំងបណ្តាលឱ្យស្លាប់ ហើយត្រូវបានអ្នកឃ្វាលគោប្រទះឃើញ ទើបរាយការណ៍ប្រាប់សមត្ថកិច្ចភ្លាមៗ ។
ចំពោះករណីនេះត្រូវបានមហាជន សន្និដ្ឋានខុសៗគ្នា ខ្លះថាអាចជាអំពើឃាតកម្ម ខ្លះទៀតថា ចងក ប៉ុន្តែសមត្ថកិច្ច សន្និដ្ឋានថាព្រះអង្ឃបានចងកសម្លាប់ខ្លួន មិនមានពាក់ព័ន្ធករណីឃាត់កម្មទេ ។ នៅព្រឹកថ្ងៃទី២៥ ខែមីនានេះ សាកសពត្រូវបាន សមត្ថកិច្ចប្រគល់ជូនក្រុមគ្រួសារទទួលយកទៅរៀបចំធ្វើបុណ្យតាម ប្រពៃណី ៕
