Hot News: ចោរគេលួចទ្រព្យសម្បត្តិ ចោរស្រីលួចយកទារក

Monday, March 25, 2013

ចោរគេលួចទ្រព្យសម្បត្តិ ចោរស្រីលួចយកទារក

រាជធានីភ្នំពេញ ៖ ស្ត្រីម្នាក់ឈ្មោះប៉ែន សុវណ្ណ អាយុ៣៣ឆ្នាំ រស់នៅភូមិសំភិន ឃុំកំពង់ចាម ស្រុកសំបូរ ខេត្តក្រចេះ ដែលមកសម្រាលកូននៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២២ មីនា ហើយបានសម្រាលកូននៅវេលាម៉ោង២រំលងអធ្រាត្រឈានចូល ថ្ងៃទី២៣ មីនា ស្រាប់តែនៅម៉ោង៩ព្រឹកថ្ងៃទី២៤ មីនា ក៏ត្រូវជនមិនស្គាល់មុខចូលបន្លំលួចបីយកទារកទើបនឹង កើតនេះទៅបាត់ បង្កឱ្យមានការភ្ញាក់ផ្អើលឆោឡោពេញមន្ទីរពេទ្យ ។

តាមប្រភពព័ត៌មានពីស្ត្រីជាម្ដាយទារកក៏ ដូចអ្នកកំដរបានឱ្យដឹងថា នៅ ព្រឹកថ្ងៃទី២៤ មីនា នោះមានស្ត្រីម្នាក់ សម្បុរខ្មៅស្រអែម បានចេញចូលក្នុងបន្ទប់ដែលគាត់សម្រាក ហើយធ្វើឫកពាដូចជាស្រឡាញ់ទារកនេះខ្លាំងណាស់ ។ ជាងនេះទៅទៀត ស្ត្រីមានគំនិតទុច្ចរិតខាងលើបានធ្វើខ្លួនបញ្ជើចទា រកលេងចុះឡើងពីរបីដងជាប់ៗគ្នាតាំងពីថ្ងៃ ទី២៣ មីនា រហូតដល់ព្រឹកថ្ងៃទី២៤ មីនា ទើបបន្លំបីទារកនេះទៅបាត់តែម្ដង ។

សូមបញ្ជាក់ថា ទារកខាងលើត្រូវជនមិនស្គាល់មុខលួចយកទៅបាត់ខណៈជីដូនដែល នៅកំដរជាប់អង្គុយលេងនៅលើបង់ខាងមុខបន្ទប់ ហើយស្ត្រីជាម្ដាយកំពុងសម្រាកភ្លេចខ្លួនមួយភ្លែត ។ ចំណែកបុរសជាប្ដី និងជាឪពុកទារកក៏មិននៅក្នុងបន្ទប់មួយភ្លែតដែរ ទើបជាហេតុធ្វើឱ្យស្ត្រីខាងលើមានឱកាសលួចយកទារកទៅ បាត់ ភ្លាមៗ ។ ចំពោះករណីនេះ សមត្ថកិច្ចមូលដ្ឋានក៏ដូចជានគរបាលស្នងការដ្ឋានរាជធានី ភ្នំពេញបានប្រកាសតាមវិទ្យុទាក់ទងដើម្បីស្ទាក់ចាប់ ស្ត្រីដែលលួចទារកខាងលើចេញពីមន្ទីរពេទ្យមិត្តភាពខ្មែរ -សូវៀត តែមិនទាន់ដឹងថា អាចចាប់ខ្លួនបានឬយ៉ាងណានៅឡើយទេ ។

ទោះបីជាបែបណា ការស្វះស្វែងដើម្បីចាប់ខ្លួនស្ត្រីដែលជាចោរលួច ទារកនោះក៏បានសម្រេចដោយចាប់ឃាត់ខ្លួនបាននៅវេលាម៉ោង ១១ និង៣០នាទីថ្ងៃដដែល នៅក្បាលសាឡាងអ្នកលឿងត្រើយខាងលិចក្នុងឃុំកំពង់ចម្លង ស្រុកលើកដែក ខេត្តកណ្ដាល ខណៈស្ត្រីនោះចេញពីមន្ទីរពេទ្យ ហើយជិះរថយន្តឈ្នួលទៅដល់អ្នកលឿងត្រើយខាងលិច ។ ពេលនោះត្រូវសមត្ថកិច្ចស្រុកលើកដែកចាប់ខ្លួន និងរំដោះយកទារកខាងលើមកប្រគល់ឱ្យឪពុកម្ដាយនៅមន្ទីរពេទ្យ មិត្តភាពខ្មែរ-សូវៀតវិញ ហើយឪពុកម្ដាយ និងស្ត្រីជាជីដូនបានថ្លែងអំណរគុណយ៉ាងខ្លាំង ចំពោះទឹកចិត្តពុះពាររបស់សមត្ថកិច្ចក្នុងការតាមស្វែង រកឃើញកូន និងចៅគាត់មកវិញ ។

សូមបញ្ជាក់ថា ឪពុករបស់ទារកខាលើឈ្មោះម៉ឹង ពិសី ហើយរូបគាត់បានសម្រេចចិត្តដាក់ឈ្មោះកូនថា ម៉ឹង សំណាង ដោយសារកូនមានសំណាងខ្ពស់ត្រូវសមត្ថកិច្ចជួយរំដោះបាន ពីចោរស្រីម្នាក់យកមកប្រគល់ឱ្យគាត់វិញ ។

មន្ត្រីប៉ូលិសស្រុកលើកដែកឱ្យដឹងថា ស្ត្រីដែលលួចទារកនេះឈ្មោះតិច ស៊ីថាច អាយុ៤៥ឆ្នាំ ជាខ្មែរកម្ពុជាក្រោម នៅភូមិចុងមាស ឃុំយិនសឿន ស្រុកកុងងាង ខេត្តទីយីន ប្រទេសវៀតណាម ។ តាមការសារភាពឱ្យដឹងខ្លះៗថា ដោយសារតែស្ត្រីរូបនេះរៀបការហើយអត់មានកូន និងចង់បានកូនពេក ឃើញមានឱកាសក៏លួចទារកយកមកតែម្ដង ក្នុងគោលបំណងគេចខ្លួនទៅប្រទេសវៀតណាម ហើយយកទារកនោះទៅចិញ្ចឹមជាកូន ។ ទោះជាបែបនេះក្ដីការឆ្លើយដោះសាដូច្នេះមិនអាចជឿបាន ទេ ព្រោះមិនខ្វះទេអ្នកអត់កូនបានទៅសុំក្មេងចិញ្ចឹមតាម មណ្ឌលកុមារកំព្រា ឬសុំតាមរយៈផ្សេងៗ មិនមែនលួចពីម្ដាយគេបែបនេះឡើយ ៕(KOH)