ភ្នំពេញ:
ប្រមុខការទូតកម្ពុជា លោកឧបនាយករដ្ឋមន្ត្រី ហោ
ណាំហុង កាលពីព្រឹកថ្ងៃទី៩ ខែមីនា ឆ្នាំ២០១៣
បានជួបសំណេះសំណាលជាមួយកងទ័ព ដែលឈរជើងនៅតំបន់ព្រះវិហារ
និងបានដឹកនាំគណៈប្រតិភូជាន់ខ្ពស់ក្រសួងការបរទេស
ចុះពិនិត្យតំបន់ភូមិសាស្ត្រ នៅតំបន់ប្រាសាទព្រះវាហារផងដែរ។
ដំណើរទៅកាន់ព្រំដែនរបស់ប្រមុខការទូតកម្ពុជាពេលនេះ
ជាការចុះពិនិត្យភូមិសាស្ត្រ នៅមុនពេលដែលតុលាការយុត្តិធម៌អន្តរជាតិ
គ្រោងនឹងធ្វើការបកស្រាយសាលក្រមរបស់តុលាការយុត្តិធម៌ ឆ្នាំ១៩៦២
នៅពាក់កណ្តាលខែមេសាខាងមុខ។នៅក្នុងពិធីសំណេះសំណាលជាមួយ កងយោធពលខេមរភូមិន្ទ នៅតំបន់ប្រាសាទព្រះវិហារ លោកឧបនាយករដ្ឋមន្ត្រី ហោ ណាំហុង បានមានប្រសាសន៍ទៅកាន់នាយទាហាន និងពលទាហាន ដែលប្រចាំការនៅតំបន់នោះ ដោយរម្លឹកពីទំនាស់ព្រំដែនរវាងប្រទេសកម្ពុជា និងថៃ ដែលជាការចិញ្ចឹមចិត្តរបស់ភាគីថៃ តាំងពីយូរមកហើយ ក្នុងការដណ្តើមយកប្រាសាទព្រះវិហារពីកម្ពុជា។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍ប្រាប់កងយោធពលខេមរភូមិន្ទ អំពីបេសកកម្ម របស់រាជរដ្ឋាភិបាលកម្ពុជា នៅតុលាការយុត្តិធម៌អន្តរជាតិ ហើយតុលាការអន្តរជាតិ គ្រោងនឹងធ្វើការបកស្រាយសាលដីកា ឆ្នាំ១៩៦២ ម្តងទៀត នៅពាក់កណ្តាលខែមេសា ឆ្នាំ២០១៣ ខាងមុខនេះ វាជាការបកស្រាយចុងក្រោយ របស់ភាគីកម្ពុជា និងថៃ នៅចំពោះមុខក្រុមប្រឹក្សាជំនុំជម្រះ តុលាការអន្តរជាតិ មុននឹងតុលាការនេះ សម្រេចថា (នឹងសម្រេចបកស្រាយ ឬមិនបកស្រាយ សាលក្រមថ្ងៃទី១៥ មិថុនា ១៩៦២) ដែលជាបណ្តឹងរបស់កម្ពុជា”។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍បញ្ជាក់ទៀតថា “ម្តងនេះ ជាការបកស្រាយផ្ទាល់មាត់លើកចុងក្រោយហើយ។ តុលាការគេនឹងសម្រេចថា បកស្រាយ ឬមិនបកស្រាយសាលក្រម ១៩៦២នេះ ហើយលទ្ធផល យើងនឹងដឹងមុនដំណាច់ឆ្នាំនេះ”។
លោកឧបនាយករដ្ឋមន្ត្រី ហោ ណាំហុង បានបង្ហាញសមាសភាពក្រុមមន្ត្រីគណៈប្រតិភូ នៃរាជរដ្ឋាភិបាលកម្ពុជា ដែលគ្រោងនឹងអញ្ជើញទៅចូលរួមធ្វើការបកស្រាយសាលក្រមឆ្នាំ១៩៦២ ដោយផ្ទាល់មាត់នៅតុលាការអន្តរជាតិ នៅពាក់កណ្តាលខែមេសា ឆ្នាំ២០១៣ នោះ រួមមាន លោកទេសរដ្ឋមន្ត្រី វ៉ា គឹមហុង , លោក ឡុង វិសាលោ រដ្ឋលេខាធិការក្រសួងការបរទេស រួមជាមួយមេធាវីបរទេសចំនួន ៣ នាក់ទៀត ដែលមានជនជាតិអង់គ្លេស អាមេរិក និងបារាំង។
នៅក្នុងឱកាសនោះដែរ ប្រមុខការទូតកម្ពុជា បានមានប្រសាសន៍លើកទឹកចិត្តដល់កងយោធពលខេមរភូមិន្ទកម្ពុជា ដែលប្រចាំការនៅតំបន់ប្រាសាទព្រះវិហារ និងនៅតាមបណ្តោយព្រំដែនខ្មែរ-ថៃ ឲ្យត្រៀមលក្ខណៈទប់ស្កាត់ជាប្រចាំនូវការបង្កហេតុ ឬការឈ្លានពានរបស់ភាគីថៃមកលើបូរណៈភាពទឹកដីកម្ពុជា ពីព្រោះកម្ពុជា បានរក្សាភាពស្ងប់ស្ងាត់ល្អជាងប្រទេសថៃ ដែលមានទំនាស់ផ្ទៃក្នុង ដែលបង្កឡើងដោយក្រុមអាវលឿងមួយចំនួន និងយោធាខ្លះ ក្នុងប្រទេសថៃ៕(CEN)
