រាជធានីភ្នំពេញ ៖
យុវជនម្នាក់បានស្លាប់បាត់បង់ជីវិតភ្លាមៗនៅនឹងកន្លែង
ដោយសារតែមានក្រុមជនអន្ធពាលមួយក្រុមមានគ្នា៤ទៅ៥នាក់ជិះម៉ូតូដេញ
តាមវាយធ្វើបាបធ្វើឲ្យគេភិតភ័យខំប្រឹងបើករត់គេចខ្លួនក្នុងល្បឿន
យ៉ាងលឿនគេចចេញពីក្រុមជនពាលទាំងនោះក៏បានជ្រុលទៅបុកគូទរថយន្តដឹក
កុងតឺន័រពេញទំហឹង បណ្ដាលឲ្យស្លាប់បាត់បង់ជីវិតតែម្ដង
ចំណែកឯក្រុមជនពាលបាននាំគ្នារត់គេចខ្លួនបាត់ស្រមោល។
ហេតុការណ៍នេះបានកើតឡើងនៅវេលាម៉ោង១២និង៤៥នាទីយប់រំលងអធ្រាត្រ
ឈានចូលថ្ងៃទី២៤ មីនា ២០១៣ នៅលើកំណាត់ផ្លូវជាតិលេខ៤
ត្រង់ចំណុចជិតបញ្ជរបង់ប្រាក់ ស្ថិតក្នុងភូមិត្រពាំងគល់ សង្កាត់កន្ទោក
ខណ្ឌពោធិ៍សែនជ័យ ។
យុវជនរងគ្រោះឈ្មោះអ៊ុន ម៉ាប់ អាយុ២២ឆ្នាំ
ជាកម្មកររោងចក្រកាត់ដេរ មានទីលំនៅភូមិរំលិច ឃុំរលាំងគ្រើល ស្រុកសំរោងទង
ខេត្តកំពង់ស្ពឺ ស្នាក់នៅផ្ទះជួលក្បែររោងចក្រកាត់ដេរយ៉ាកជីង
ស្ថិតក្នុងភូមិតាសេក សង្កាត់កំបូល ខណ្ឌពោធិ៍សែនជ័យ។
រូបគេជិះម៉ូតូមួយគ្រឿងម៉ាកហុងដាវ៉េវអីុ ពណ៌ខ្មៅ
ជ្រុលទៅបុកគូទរថយន្តដឹកកុងតឺន័រមួយគ្រឿងម៉ាក ISUZU ពណ៌ខៀវ
ដែលចតឈប់ស្ងៀមនៅលើចិញ្ចើមផ្លូវជាតិលេខ៤នោះ៕(ប្រភពពីកោះសន្តិភាព)
