រាជធានីភ្នំពេញ ៖ សម្តេចនាយករដ្ឋមន្ត្រី ហ៊ុន
សែន បានសម្តែងការសោកស្តាយ និងចូលរួមមរណទុក្ខជាមួយក្រុមគ្រួសារសព
ដែលបានស្លាប់ដោយគ្រោះថ្នាក់ចរាចរណ៍ទៅលើរថយន្តអ្នកចម្រៀងខេមរៈ
សិរីមន្ត នៅខេត្តព្រះសីហនុ
និងគ្រោះថ្នាក់ចរាចរណ៍ដែលបង្កឡើងដោយនិស្សិតពេទ្យនៅមុខក្រសួងមហាផ្ទៃ
កាលពីពេលថ្មីៗនេះ ។
ជាមួយគ្នានេះដែរ សម្តេចអគ្គមហាសេនាបតីតេជោ ហ៊ុន សែន
ក៏បានថ្លែងអំពាវនាវដល់ប្រជាពលរដ្ឋ និងអាជ្ញាធរពាក់ព័ន្ធទំាងអស់
ត្រូវចូលរួមទាំងអស់គ្នា ដើម្បីទប់ស្កាត់
និងការពារកុំឲ្យមានគ្រោះថ្នាក់ចរាចរណ៍
ដែលបានបង្កមហន្តរាយដល់សង្គមគ្រួសារ និងដល់ប្រទេសជាតិ។
សម្តេចក៏បានអំពាវនាវផងដែរ សូមឲ្យអនុវត្តនូវពាក្យស្លោកថា «ថ្ងៃនេះ
និងថ្ងៃស្អែក សូមកុំឲ្យមានគ្រោះថ្នាក់ចរាចរណ៍» ។
ថ្លែងជាសាធារណៈនៅវិទ្យាស្ថានជាតិអប់រំ
នាព្រឹកថ្ងៃទី១១ មីនា ២០១៣
ក្នុងពិធីប្រគល់វិញ្ញាណបនបត្រដល់សិស្សជំនាញថ្នាក់វិជ្ជាជីវៈ
និងនិស្សិតថ្នាក់បរិញ្ញាបត្ររងចំនួន១៩៥៩នាក់
មកពីវិទ្យាស្ថានខ្មែរជំនាន់ថ្មី សម្តេចតេជោ ហ៊ុន សែន
ក៏បានអំពាវនាវជាថ្មីផងដែរ
ឲ្យប្រជាពលរដ្ឋនៅទូទាំងប្រទេសប្រុងប្រយ័ត្នខ្ពស់
ចំពោះគ្រោះអគ្គិភ័យដែលបានឆក់យកអាយុជីវិតមនុស្សសត្វ
និងបំផ្លាញទ្រព្យសម្បត្តិអស់ជាច្រើនចាប់តំាងពីដើមឆ្នាំ២០១៣នេះ ។
សម្តេចនាយករដ្ឋមន្ត្រី ហ៊ុន សែន
ក៏បានស្នើឲ្យស្ថានីយ៍ទូរទស្សន៍ វិទ្យុ
ត្រូវធ្វើការផ្សព្វផ្សាយឲ្យបានទូលំទូលាយ មុនបញ្ចប់ការផ្សាយរបស់ខ្លួន
ដើម្បីឲ្យប្រជាពលរដ្ឋបានយល់ដឹងមួយបន្ថែមទៀតទាក់ទងទៅនឹងគ្រោះអគ្គិភ័យ
ក៏ដូចជាគ្រោះថ្នាក់ចរាចរណ៍ ៕
