រាជធានីភ្នំពេញ ៖
ប្រភពព័ត៌មានច្បាស់ការបានប្រាប់ឱ្យដឹងថា លោកយាន ស៊ីណា
អនុរដ្ឋលេខាធិការក្រសួងយុត្តិធម៌
និងអតីតក្រឡាបញ្ជីសាលាដំបូងរាជធានីភ្នំពេញ
ដែលបានប្រើអំពើហិង្សាវាយអ្នកកាសែតជិត១០នាក់ឱ្យរងរបួសខ្លះ
ធ្ងន់ ខ្លះស្រាល កាលពីយប់ថ្ងៃទី ១៩ មីនា
ស្ថិតនៅទឹកដីសង្កាត់បឹងរាំង ខណ្ឌដូនពេញ
ក្នុងហេតុការណ៍គ្រោះថ្នាក់ចរាចរណ៍មួយ
ពេលនេះបានរត់គេចខ្លួនទៅដល់ប្រទេសថៃបាត់ទៅហើយមុនពេលតុលាការ
បានចេញដីកាបញ្ជាឱ្យនាំខ្លួនទៀតផង ។
ប្រភពបន្តថា លោកអនុរដ្ឋលេខាធិការ យាន ស៊ីណា
គេចខ្លួនទៅប្រទេសថៃ តាមច្រករបៀងខេត្តកោះកុង
ដោយធ្វើដំណើរតាមទូកនេសាទឆ្លងកាត់សមុទ្រដ៏ល្វឹងល្វើយ
និងមានមិត្តភក្តិជាអ្នកធំជូនទៅ ។ ប្រភពឱ្យដឹងថា យប់ថ្ងៃទី១៩
មីនា ពេលមានគ្រោះថ្នាក់ចរាចរណ៍លោកយាន ស៊ីណា
ស្រវឹងជោកជាំខ្លួនអន់មារយាទបានប្រើអំពើហិង្សាវាយទៅលើអ្នក
កាសែត ទូរទស្សន៍ ជិត១០នាក់ឱ្យរងរបួស
គ្រាន់តែទៅថតយកព័ត៌មាននៅកន្លែងកើតហេតុនោះ
ក្នុងអំពើហិង្សាយប់នោះក្រុមលោកយាន ស៊ីណា មានបក្សពួក៧-៨នាក់
ព្រួតគ្នាវាយអ្នកកាសែត រួចមានបំណងគេចខ្លួនទាំងអស់ ។
ប៉ុន្តែពេលនោះត្រូវបានក្រុមអ្នកកាសែតចាប់ខ្លួនភាគីបង្ក៣នាក់
ប្រគល់ឱ្យសមត្ថកិច្ចចាត់ការតាមផ្លូវច្បាប់
ជនទាំង៣នាក់នោះមានលោកយាន ស៊ីណា
អនុរដ្ឋលេខាធិការក្រសួងយុត្តិធម៌ លោកដេវីត ឆាណាយវា អតីតមេធាវី
និងជាមន្ត្រីនគរបាលក្រសួងមហាផ្ទៃ និងឈ្មោះអ៊ូ ហ្វី
ត្រូវជាក្មួយលោកដេវីត ឆាណាយវា៕(KOHSANTEPHEAP)
