បុរសជាប់ចោទ ឈ្មោះ យី ចាន់ថន អាយុ ២៨ឆ្នាំ មានទីលំនៅភូមិថ្មកែវ ឃុំស្វាយជ្រុំ ស្រុករលាប្អៀរ និងជាអ្នកបើកបររថយន្តដឹកលៀស អោយបងថ្លៃនារីរងគ្រោះ។
ជននេះ ត្រូវសមត្ថកិច្ចចាប់ខ្លួន បានភ្លាមៗ ក្រោយពេលធ្វើសកម្មភាព ហើយបញ្ជូនមកកាន់ស្នងការដ្ឋាននគរបាល ខេត្តកំពង់ឆ្នាំង ដើម្បីចាត់ការបន្តតាមនីតិវិធី។
នារីរងគ្រោះអាយុ ២៨ឆ្នាំ មានទីលំនៅក្នុងខេត្តបាត់ដំបង។ នារីរងគ្រោះ ទើបតែមករស់នៅជាមួយបង ក្នុងភូមិចំការតាម៉ៅ ឃុំស្រែថ្មី ស្រុករលាប្អៀ បានរយៈពេលជាងមួយខែប៉ុណ្ណោះ។
ក្រោយពេល ឃាត់ខ្លួន ជនសង្ស័យឈ្មោះ យី ចាន់ថន បានសារភាពថា បន្ទាប់ពីរូបគេផឹកទឹកត្នោតជូ ស្រវឹងស្រឿងៗ បានដើរឡើងទៅលើផ្ទះ ឃើញនាងរងគ្រោះ កំពុងអង្គុយរើសគ្រាប់ស្រូវចេញពីអង្ករ នៅផ្ទះបាយម្នាក់ឯង ហើយដោយខ្លួនស្រឡាញ់នាងពេក ទ្រាំមិនបាន ក៏ចាប់បង្ខំរំលោភតែម្តង។
ក្រោយពីរំលោភបានសម្រេចហើយ បុរសជាប់ចោទអះអាងថា ឃើញនាងធ្លាក់ឈាមច្រើនពេក រូបគេក៏បានជិះម៉ូតូ ចេញទៅខាងក្រៅ។ មួយសន្ទុះ បុរសជាប់សង្ស័យ ជិះម៉ូតូត្រឡប់មកផ្ទះថៅកែស្រីវិញ ក៏ត្រូវសមត្ថកិច្ចចាប់ខ្លួនតែម្តង៕(CEN)
