ភ្នំពេញ: សារលិខិតដែលចុះហត្ថលេខាដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាកាលពីថ្ងៃទី២ ខែមេសា ឆ្នាំ២០១៣ ផ្ញើជូនជនរួមជាតិ កម្ពុជាក្នុងឱកាសបុណ្យចូលឆ្នាំខ្មែរប្រពៃណីជាតិបានឲ្យដឹងថា ថ្ងៃ៤-៥ និង ៦ កើត ខែចេត្រ ត្រូវនឹងថ្ងៃអាទិត្យ ទី១៤ ថ្ងៃចន្ទ ទី១៥ និងថ្ងៃអង្គារ ទី១៦ ខែមេសា ឆ្នាំ២០១៣ គឺជា ទិវាដ៏មហាប្រសើរដែលប្រជាពលរដ្ឋខ្មែរទាំងអស់គ្នារៀបចំពិធីអបអរសាទរ បុណ្យចូលឆ្នាំថ្មី ប្រពៃណីជាតិ ឆ្នាំម្សាញ់ បញ្ចស័ក ព.ស ២៥៥៧ ប្រកបដោយសេចក្តីសោមនស្សរីករាយ សិរីសួស្តី និង ជ័យមង្គលដ៏ឧត្តុងឧត្តមក្នុងគ្រួសារ និង សង្គមជាតិទាំងមូល។
នៅក្នុងឱកាសដ៏វិសេសវិសាលនេះទូលបង្គំ ខ្ញុំព្រះករុណា ខ្ញុំ សូមចូលរួមជាមួយបងប្អូនជនរួមជាតិទាំងអស់ដែល កំពុងរស់នៅក្នុងប្រទេស និង ក្រៅប្រទេសក្នុងពិធីទទួលទេវតាឆ្នាំថ្មី ឆ្នាំម្សាញ់ បញ្ចស័ក ព.ស ២៥៥៧ ស្របពេលដែលព្រះរាជាណាចក្រកម្ពុជាកំពុងបន្តអភិវឌ្ឍលើគ្រប់វិស័យ។
សម្តេចអគ្គមហាសេនាបតីតេជោ ហ៊ុន សែន បានបន្តថា ឆ្នាំរោង ចត្វាស័ក ព.ស ២៥៥៦ ដែលកន្លងផុតទៅក៏ដូចជាបណ្តាឆ្នាំមុនៗដែរ គឺតែងតែបន្សល់ទុកនូវសមិទ្ធផលជាច្រើនដែល រាជរដ្ឋាភិបាលសម្រេចបានក្នុងការអនុវត្តយុទ្ធសាស្ត្រចតុកោណដំណាក់កាល ទី២ ដើម្បី កំណើន ការងារ សមធម៌ និង ប្រសិទ្ធភាពនៅកម្ពុជា។ ជោគជ័យប្រកបដោយផ្លែផ្កានេះគឺកើត ឡើងដោយសារការខិតខំប្តេជ្ញាដ៏មោះមុត ពុះពារគ្រប់ឧបសគ្គរបស់ថ្នាក់ដឹកនាំរាជរដ្ឋាភិបាល ទាំងនៅស្ថាប័នថ្នាក់ជាតិ ទាំងថ្នាក់ក្រោមជាតិ ព្រមទាំងកងកម្លាំងប្រដាប់អាវុធគ្រប់ប្រភេទ ក្នុងភារកិច្ចការពារសន្តិភាព សុវត្ថិភាព សណ្តាប់ធ្នាប់សាធារណៈ ការរក្សានូវស្ថិរភាព នយោបាយ និង ក្នុងការអភិវឌ្ឍប្រទេសជាតិទាំងមូល។ ក្នុងឆ្នាំរោង ចត្វាស័ក ព.ស ២៥៥៦ កន្លងទៅនេះ រាជរដ្ឋាភិបាលសម្រេចបានកំណើនសេដ្ឋកិច្ចប្រមាណ ៧,៣% ដែលជាកំណើន ខ្ពស់ជាងគេក្នុងចំណោមបណ្តាប្រទេសអាស៊ានទាំង១០ អាស្រ័យដោយផ្នែកកសិកម្ម ឧស្សាហកម្ម កាត់ដេរ និង សេវាកម្មទេសចរណ៍បានបន្តកើនឡើងគួរឲ្យកត់សម្គាល់ ហើយអាចរក្សាបាននូវស្ថេរភាពជាសារវន្តនៃអតិផរណាទៀតផង។
សម្តេចអគ្គមហាសេនាបតីតេជោ ហ៊ុន សែន បានបញ្ជាក់ថា ក្នុងឆ្នាំកន្លងទៅបរិមាណផលិតផលស្រូវរដូវវស្សា និង ស្រូវរដូវប្រាំង សម្រចបានជាង ៩លានតោន និង សល់ស្រូវជាង ៤លាន៧សែនតោន បន្ទាប់ពីកាត់ចេញនូវបរិមាណស្រូវដែលត្រូវការជាស្បៀង ពូជ ចំណីសត្វ និង ការបាត់បង់ដោយការប្រមូលផល។ រោងចក្រកាត់ដេរ និង ចាក់ សរុបនៅទូទាំងប្រទេស មានចំនួន ៥៤៣ មានពលករបម្រើការងារចំនួនប្រមាណ ៤៩ ម៉ឺននាក់។ ភ្ញៀវទេសចរអន្តរជាតិបានចូលមកព្រះរាជាណាចក្រកម្ពុជាមានជាង ៣លាន៥សែននាក់ កើនឡើងជាង ២៤% បើធៀបនឹងឆ្នាំ២០១១។ ការវិនិយោគលើគម្រោងថ្មី និង គម្រោងដែលមានស្រាប់មានចំនួន ២១៨ គម្រោង មានទុនវិនិយោគសរុបជិត ៣ពាន់ដុល្លាអាមេរិក និង បង្កើតការងារជូនប្រជាពលរដ្ឋបានជាង ៣៣ ម៉ឺនកន្លែង។
សម្តេច អគ្គមហាសេនាបតីតេជោ ហ៊ុន សែន បានបន្តបន្ថែមទៀតថា នៅក្នុងឆ្នាំរោង ចត្វាស័ក ព.ស ២៥៥៦ រាជរដ្ឋាភិបាលបានបន្តកសាងបើកការដ្ឋានសាងសង់សំណង់ធំៗ និង សម្ពោធដាក់ឲ្យប្រើប្រាស់នូវសមិទ្ធផលមួយចំនួនមានជាអាទិ៍ ផ្លូវជាតិ សំណង់អាគារឯកជន ខ្ពស់ៗ ស្ពានអាកាសនៅរាជធានីភ្នំពេញ អាគារទីស្តីការក្រសួង អាគាររដ្ឋបាល មណ្ឌលសុខភាព អាគារសិក្សា រោងចក្រ និង ទីផ្សារទំនើបៗ ព្រមទាំងបានស្តារឡើងវិញនូវ ហេដ្ឋារចនាសម្ព័ន្ធរូបវ័ន្តដូចជា ផ្លូវខេត្ត ផ្លូវលំជនបទ លូ និង សំណង់ធារាសាស្ត្រមួយចំនួន ទៀតដែលបានរងការខូចខាតដោយសារទឹកជំនន់ក្នុងឆ្នាំ ២០១១ កន្លងទៅផងដែរ។ ដើម្បីបង្កើនប្រសិទ្ធភាពនៃការដឹកនាំឆ្ពោះទៅរកការរីកចម្រើនប្រកបដោយ និរន្តរភាព រាជរដ្ឋាភិបាលបានដាក់ចេញនូវគោលនយោបាយកែទម្រង់លើវិស័យជាច្រើន ក្នុងនោះមាន ការកែទម្រង់វិស័យជលផល និង ការកែទម្រង់វិស័យដីធ្លីដ៏ស៊ីជម្រៅជាដើម។ ជាក់ស្តែងក្នុងឆ្នាំ ២០១២ កន្លងទៅ រាជរដ្ឋាភិបាលបានសម្រេចលុបឡូតិ៍នេសាទទឹកសាបទាំងអស់នៅក្នុង ព្រះរាជាណាចក្រកម្ពុជា ដើម្បីប្រគល់ជូនប្រជាពលរដ្ឋធ្វើការនេសាទជាលក្ខណៈគ្រួសារ និង រក្សាទុកជាតំបន់អភិរក្សជលផលដោយមានការទទួលអបអរសាទរយ៉ាងខ្លាំងពី ប្រជាពលរដ្ឋ និង បានធ្វើឲ្យទិន្នផលត្រីទឹកសាបកើនឡើង។ ព្រមជាមួយនេះ រាជរដ្ឋាភិបាលបានចាត់វិធាន ការផ្អាកការផ្តល់សម្បទានដីសេដ្ឋកិច្ចបន្ថែមទៀត បន្ទាប់មកបានអនុវត្តយុទ្ធនាការ “នយោបាយចាស់ សកម្មភាពថ្មី” លើវិស័យដីធ្លីដើម្បីវាស់វែង និង ផ្តល់កម្មសិទ្ធិដីលំនៅដ្ឋាន និង ដីស្រែចម្ការជូនប្រជាពលរដ្ឋទូទៅ និង កសិករជាអ្នកកាន់កាប់ប្រើប្រាស់ដីជាក់ស្តែងដែល គ្របដណ្តប់លើផ្ទៃដីជិត ២លានហិកតា និង មានប្រជាពលរដ្ឋជិត ៥០ម៉ឺនគ្រួសារដែលត្រូវ ទទួលបានកម្មសិទ្ធិដី។ វិរយុវជនស្ម័គ្រចិត្តសម្តេចតេជោជាង ២.០០០ នាក់ មន្ត្រីជំនាញ និង មន្ត្រីជំនាញពីស្ថាប័ននានាជិត ២.០០០ នាក់ បាននឹងកំពុងអនុវត្តយ៉ាងសកម្មនូវការងារនេះ នៅខេត្តគោលដៅនៅទូទាំងប្រទេសដែលនឹងត្រូវបញ្ចប់នៅរវាងដើមឆ្នាំ ២០១៤។
សម្តេចអគ្គមហាសេនាបតីតេជោ ហ៊ុន សែន បានបញ្ជាក់បន្ថែមទៀតថា ក្រៅពីសមិទ្ធផល សំខាន់ៗលើវិស័យសេដ្ឋកិច្ច និង សង្គម ដែលរាជរដ្ឋាភិបាលសម្រេចបាននៅក្នុងឆ្នាំ ២០១២ នេះព្រះរាជាណាចក្រកម្ពុជាបានទតួលកិត្តិយសដ៏ឧត្តុងឧត្តម ធ្វើជាប្រធានអាស៊ាន និង ជាម្ចាស់ផ្ទះដឹកនាំកិច្ចប្រជុំកំពូលអាស៊ាន និង កិច្ចប្រជុំពាក់ព័ន្ធដទៃទៀតទទួលបានលទ្ធផល ប្រកបដោយជោគជ័យយ៉ាងត្រចះត្រចង់ដែលបានធ្វើឲ្យប្រទេសនៅក្នុងតំបន់ និង ពិភពលោក មើលឃើញថែមទៀតអំពីសមត្ថភាពរបស់កម្ពុជាក្នុងការចូលរួមដោះស្រាយ កិច្ចការនៅក្នុង តំបន់ ក៏ដូចជានៅក្នុងពិភពលោកផងដែរ។ ព្រះរាជាណាចក្រកម្ពុជាបានពង្រឹងស្មារតី និង វប្បធម៌សន្តិភាពរួមចំណែករក្សាសន្តិភាពនៅក្នុងតំបន់ និង ពិភពលោក ដោយបានចូលរួមជា ភាគីនៃអនុសញ្ញា និង សន្ធិសញ្ញាអន្តរជាតិជាច្រើនទៀត ពាក់ព័ន្ធនឹងការកាត់បន្ថយសព្វាវុធ ការទប់ស្កាត់ការរីកសាយនៃអាវុធប្រល័យលោក ការប្រយុទ្ធប្រឆាំងនឹងភេរវកម្មជាដើម។ ទន្ទឹមនេះរាជរដ្ឋាភិបាលកម្ពុជាក៏បានចាប់បញ្ជូនកងយោធពលខេមរភូមិន្ទទៅ បំពេញបេសកកម្មថែរក្សាសន្តិភាពក្នុងក្របខ័ណ្ឌអង្គការសហប្រជាជាតិដែល បច្ចុប្បន្នកំពុងមានវត្តមាននៅ ប្រទេសលីបង់ និង ប្រទេសស៊ូដង់ខាងត្បូងសរុបចំនួន ៣៧០ នាក់។
សម្តេច អគ្គមហាសេនាបតីតេជោ ហ៊ុន សែន បានបន្ថែមផងដែរថា ទន្ទឹមនឹងសមិទ្ធផលធំៗ ដែលសម្រេចបាននៅក្នុងឆ្នាំរោង ចត្វាស័ក ព.ស ២៥៥៦ កន្លងផុតទៅនេះរាជរដ្ឋាភិបាល កងកម្លាំងប្រដាប់អាវុធគ្រប់ផ្នែក ព្រះសង្ឃ និង ប្រជាជនកម្ពុជាទាំងនៅក្នុង និង ទាំងនៅក្រៅ ប្រទេសមានទុក្ខក្រៀមក្រំជាទីបំផុត និង មានក្តីសោកសង្រេងដ៏មហាធំធេងក្រៃលែងដោយ សារការយាងចូលព្រះទិវង្គមរបស់ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និង ឯកភាពជាតិខ្មែរ ជាទីសក្ការៈដ៏ ខ្ពង់ខ្ពស់កាលពីថ្ងៃទី១៥ ខែតុលា ឆ្នាំ២០១២ កន្លងទៅ។ ការយាងចូលព្រះទិវង្គតរបស់ព្រះអង្គ គឺជាការបាត់បង់ព្រះមហាវីរក្សត្រមួយព្រះអង្គប្រកបដោយទសពិធរាជធម៌កម្រ រកបាន ដែលមានបទពិសោធចាស់ទុំក្នុងចលនាបង្រួបបង្រួមជាតិ ផ្សះផ្សាជាតិ មហាសាមគ្គីជាតិ និង ឯកភាពជាតិរឹងមាំ និង ក៏ជាការបាត់បង់កំពូលស្ថាបនិកសន្តិភាពជាតិ អន្តរជាតិមួយព្រះអង្គ ដ៏មានប្រជាប្រិយភាពផងដែរ។ ជាថ្មីម្តងទៀតសូមសំដែងនូវការកោតសរសើរដោយស្មោះ ចំពោះវីរភាពរបស់កងកម្លាំងប្រដាប់អាវុធគ្រប់ប្រភេទ ទាំងកងយោធពលខេមរភូមិន្ទ និង កងនគរបាលជាតិគ្រប់ផ្នែក គ្រប់លំដាប់ថ្នាក់ដែលមានឆន្ទៈមោះមុត អង់អាចក្លាហានកាពារ បានរឹងមាំនូវបូរណភាពទឹកដីនៃមាតុភូមិកម្ពុជា និង សូមថ្លែងអំណរគុណដ៏ជ្រាលជ្រៅចំពោះ សមាជិក សមាជិកាដ៏ឧត្តុងឧត្តមនៃស្ថាប័ននីតិប្បញ្ញត្តិ សមាជិក សមាជិការាជរដ្ឋាភិបាល មន្ត្រីរាជការ ព្រះសង្ឃ សង្គមស៊ីវិល ប្រជាពលរដ្ឋគ្រប់ស្រទាប់ និង ដៃគូអភិវឌ្ឍនានាដែល បានចូលរួមយ៉ាងសកម្មក្នុងការគាំទ្រ និង អនុវត្តកម្មវិធីនយោបាយ និង យុទ្ធសាស្ត្រចតុកោណដំណាក់កាលទី២ របស់រាជរដ្ឋាភិបាលដោយបានធ្វើឲ្យមាតុភូមិកម្ពុជា យើងរក្សាការពារបាននូវសន្តិភាព ស្ថិរភាព សុវត្ថិភាព និង សណ្តាប់ធ្នាប់សាធារណៈយ៉ាងល្អ ប្រសើរដែលជាកត្តាមិនអាចខ្វះបានក្នុងការអភិវឌ្ឍលើគ្រប់វិស័យ។
សម្តេចអគ្គមហាសេនាបតីតេជោ ហ៊ុន សែន បានបញ្ជាក់ផងដែរថា សម្រាប់ឆ្នាំថ្មីឆ្នាំម្សាញ់ បញ្ចស័ក ព.ស ២៥៥៧ រាជរដ្ឋាភិបាលនឹងខិតខំបន្តថែរក្សាសន្តិភាព ស្ថេរភាព សន្តិសុខ និង សណ្តាប់ធ្នាប់សាធារណៈឲ្យបានកាន់តែរឹងមាំដែលធានាបាននូវបរិស្ថាន អនុគ្រោះសម្រាប់ការ អភិវឌ្ឍប្រកបដោយចីរភាព បន្តជំរុញការអនុវត្តគោលនយោបាយជំរុញផលិតកម្មស្រូវ និង ការនាំចេញអង្ករ ព្រមជាមួយនឹងកសិផលដទៃទៀត បន្តការកសាង និង កែលម្អហេដ្ឋារចនាសម្ព័ន្ធរូបវន្ត ពិសេសហេដ្ឋារចនាសម្ព័ន្ធរូបវន្តដែលបានខូចខាតដោយទឹកជំនន់ក្នុងឆ្នាំ ២០១១ បន្តពង្រឹង និង ពង្រីកផ្នែកឧស្សាហកម្មកាត់ដេរ និង ផ្នែកសេវាកម្មទេសចរណ៍ បន្តធ្វើកំណែទម្រង់រដ្ឋដ៏ស៊ីជម្រៅលើវិស័យសំខាន់ៗមួយចំនួន ក្នុងនោះបន្តជំរុញការអនុវត្តនយោបាយចាស់ សកម្មភាពថ្មីលើវិស័យដីធ្លី និង ការផ្តល់ដីសម្បទានសង្គមកិច្ចជូនប្រជាពលរដ្ឋដែលគ្មានដីពិតប្រាកដ សម្រាប់សាងសង់លំនៅដ្ឋាន និង បង្កបង្កើនផល ព្រមទាំងបន្តអនុវត្តភារកិច្ច ធំៗផ្សេងទៀតដើម្បីឈានទៅសម្រេចបាននូវការកាត់បន្ថយភាពក្រីក្ររបស់ ប្រជាពលរដ្ឋ និង ឆ្ពោះទៅរកអនាគតមួយដ៏រុងរឿង ភ្លឺស្វាងស្របតាមឆន្ទៈ និង បំណងប្រាថ្នារបស់ប្រជាជាតិ កម្ពុជាទាំងមូល។ ក្នុងនាមរាជរដ្ឋាភិបាល និង ក្នុងនាមទូលបង្គំជាខ្ញុំ ព្រមទាំងមន្ត្រីរាជការ កងយោធពលខេមរភូមិន្ទ កងនគរបាលជាតិ និង បងប្អូនជនរួមជាតិទាំងអស់ សូមលំឱនកាយវាចាចិត្តបួងសួងដល់គុណបុណ្យព្រះរតនត្រ័យ និង ទេវតាឆ្នាំថ្មីព្រះនាម ទុង្សាទេវី សូមថ្វាយព្រះរាជសព្ទសាធុការពរ បវរមហាប្រសើរ ចំពោះព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និង សម្តេច ព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរក្នុងសេរីភាព សេចក្តីថ្លៃថ្នូរ និង សុភមង្គល ជាទីសក្ការៈដ៏ខ្ពង់ខ្ពស់ដែលព្រះអង្គកំពុងគង់ប្រថាប់ជាម្លប់ដ៏ ត្រជាក់នៃប្រជាពលរដ្ឋខ្មែរគ្រប់ៗរូប សូមព្រះករុណាជាអង្គម្ចាស់ជីវិតលើត្បូង និង សម្តេចព្រះវររាជមាតាជាតិ ខ្មែរមានព្រះកាយពលមាំមួន ព្រះបញ្ញាញាណភ្លឺថ្លា និង ព្រះជន្មាយុយឺនយូរ ដើម្បីបន្តនាំនាវាកម្ពុជាឆ្ពោះទៅកាន់ត្រើយវឌ្ឍនភាព និង សុភមង្គល។
សម្តេចអគ្គមហាសេនាបតីតេជោ ហ៊ុន សែន បានបញ្ជាក់បន្ថែមថា ក្នុងនាមរាជរដ្ឋាភិបាល និង ក្នុងនាមទូលបង្គំ ខ្ញុំព្រះករុណា ខ្ញុំ សូមថ្វាយ និង ប្រគេនព្រះពរចំពោះសម្តេចអគ្គមហា សង្ឃរាជាធិបតី សម្តេចព្រះសង្ឃរាជ សម្តេចព្រះរាជាគណៈ និង ព្រះសង្ឃគ្រប់ព្រះអង្គ និង សូមជូនពរដល់ជនរួមជាតិកម្ពុជាដែលកំពុងរស់នៅក្នុង និង ក្រៅប្រទេស មន្ត្រីរាជការ នាយទាហាន ពលទាហាននៃកងយោធពលខេមរភូមិន្ទដែលកំពុងបំពេញភារកិច្ចការពារអធិបតេយ្យ បូរណភាពទឹកដីនៃព្រះរាជាណាចក្រកម្ពុជានៅតំបន់ព្រំដែន និង កំពុងបំពេញ បេសកកម្មរក្សាសន្តិភាព និង មនុស្សធម៌នៅក្រៅប្រទេស នាយនគរបាល ពលនគរបាល ក្មួយៗសិស្សានុសិស្ស និស្សិត យុវជន យុវនារី កម្មករ និយោជិត ធុរជន និង វិនិយោគិនដែល កំពុងប្រកបធុរកិច្ចនៅលើទឹកដីកម្ពុជា សូមទទួលបាននូវសិរីសួស្តី ជ័យមង្គល និង វិបុលសុខ ជាដរាបតរៀងទៅ៕(CEN)
