ចាប់​ខ្លួន​នារីម៉ាស្សា​ម្នាក់​ដែល​ចាញ់បោក​បុរសចំណាស់​​នាំយកទៅបញ្ចាំ​​កន្លែង​លក់មាស​

ខេត្ត​កណ្តាល ៖ ស្រ្តីម្នាក់ដែលមាន​មុខរបរជាអ្នកម៉ាស្សា​កោសជប់ ត្រូវបានសមត្ថកិច្ចនគរបាល​ស្រុកកៀនស្វាយ ចាប់ខ្លួន​​នៅផ្សារ​គគីរ ​កាល​ពីព្រឹកថ្ងៃទី៨​ មេសា ២០១៣ បន្ទាប់ពីនារីរូប​នេះត្រូវបុរសចំណាស់ម្នាក់នាំមក​ទិញមាស១តម្លឹងកន្លះយក​ ទៅបាត់ ហើយ​មិនត្រឡប់​មកវិញ ទើបអ្នកលក់មាសប្តឹង​ឲ្យសមត្ថកិច្ចចាប់ខ្លួននារីម៉ាស្សា​ដែល​ ចាញ់បោកបុរសចំណាស់​នាំ​យកមក​បញ្ចាំនៅ​​កន្លែង​លក់​មាស ។

ស្ត្រីខាង​លើឈ្មោះប៊ុត ញឹច អាយុ៣៥ឆ្នាំ ​ជាអ្នកម៉ាស្សា​កោសជប់ នៅរាជធានីភ្នំពេញ ។ មូលហេតុដែលសមត្ថកិច្ច​ឃាត់ខ្លួន​​ស្រ្តីរូប​នេះ​គឺ​ដោយ​ សាររូបនាងចាញ់បោកបុរស​ចំណាស់ម្នាក់នាំពីភ្នំពេញទៅទិញ​មាសនៅផ្សារគគីរ ពេលថ្លឹង​មាសត្រូវរ៉ូវ​គ្នាជាង​​២តម្លឹង​បុរស​ចំណាស់នោះ​ក៏បាន​និយាយថា ខ្វះលុយដូច្នេះរូបគាត់​យកមាសតែ១តម្លឹងកន្លះខ្ចប់ដាក់​ហោប៉ៅខោ ហើយប្រាប់អ្នក​​លក់មាស​ថា ខ្ញុំទៅ​យកលុយមក​ទូទាត់ឲ្យ ដោយទុកនារីម៉ាស្សា​ខាងលើនេះ នៅកន្លែងលក់មាស ។ ​ប៉ុន្តែធាតុពិតបុរសកំហូច​នោះបាន​គេច​ខ្លួន​បាត់ ជាហេតុធ្វើឲ្យអ្នកលក់​មាស​ចាប់ខ្លួនស្រ្តីម៉ាស្សា​ខាងលើ​នេះ ប្តឹងប៉ូលិសថា នាងជាប្រពន្ធរបស់​បុរសចំណាស់ដែល​នាំមក​ទិញ​មាស ៕(KOH)