ស្ថិតក្នុងរាងកាយអាក្រាតសល់តែខោទ្រនាប់ និងអាវទ្រនាប់ យុវនារីម្នាក់ ត្រូវបានជនមិនស្គាល់មុខ ដឹកយកទៅទម្លាក់ចោលក្បែរក្លោងទ្វារផ្សារតាខ្មៅថ្មី ជាមួយនឹងឈាមប្រឡាក់ពេញខ្លួនកាលពីព្រលឹមស្រាងៗថ្ងៃទី២មេសានេះ។
ជនរងគ្រោះមានស្នាមចាក់នឹងរបស់ស្រួចជាច្រើនកន្លែង ហើយនៅពេលដែលសន្តិសុខផ្សារ និងសមត្ថកិច្ចចុះទៅពិនិត្យ នាងស្រែកដោយរវើរវាយ។ សមត្ថកិច្ចបានបញ្ជូននាងទៅជួយសង្គ្រោះនៅមន្ទីរពេទ្យជ័យជំនះក្រុង តាខ្មៅ។
បន្ទាប់ពីសម្រាកព្យាបាលមានស្មារតីឡើងវិញ នារីរងគ្រោះបានឲ្យដឹងថា នាងឈ្មោះ ផុង ស្រីជិន អាយុ១៩ឆ្នាំ ជនជាតិវៀតណាម មានទីលំនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ជាស្រីបម្រើការនៅក្នុងហាងខារ៉ាអូខេ ១៦៨បឹងត្របែក ខណ្ឌចំការមន រាជធានីភ្នំពេញ។
នៅវេលាម៉ោង១រំលងអធ្រាត្រ ថ្ងៃទី២ ខែមេសា ឆ្នាំ២០១៣ ពេលឈប់ពីការងារ នាងបានដើរទៅការ៉ាសសាំងកាល់តិច មុខសាលារៀនបឹងត្របែក ស្រាប់តែមានមនុស្សប្រុសពីរ ស្រីមួយ ជិះម៉ូតពីរគ្រឿង មកស្ទាក់ពីមុខនាងហើយស្ត្រីម្នាក់នោះ បានយកកូនកាំបិតចុងស្រួចមកភ្ជង់ក ហើយគម្រាមបង្ខំនាងឲ្យឡើងជិះម៉ូតូជាមួយបុរសម្នាក់ មកកាន់ផ្ទះសំណាក់ដើមមៀននៅក្រុងតាខ្មៅ។ ពេលទៅដល់ផ្ទះសំណាក់ បុរសម្នាក់ និងស្ត្រីដែលគម្រាមនាងឲ្យឡើងជិះម៉ូតូនោះ បានគេចខ្លួនបាត់ទៅ ចំណែកឯមនុស្សប្រុសដែលឌុបរូបនាងមក បានរុញខ្លួននាងចូលក្នុងបន្ទប់ផ្ទះសំណាក់ ហើយចាប់រំលោភនាងក្នុងបន្ទប់ទឹក នៅលើចានបង្គន់ ពេលនោះនាងបានប្រកែកមិនព្រម ក៏បានប្រតាយប្រតប់គ្នា រួចជននោះ យកកូនកាំបិតចាក់ចំទ្រូងនាង និងដៃស្តាំមួយកាំបិត បណ្តាលឲ្យនាងសន្លប់បាត់ស្មារតី។
ប៉ូលិសនិយាយថា នារីរងគ្រោះបានរៀបរាប់ហាក់មានចន្លោះ និងអាថ៌កំបាំងច្រើន ប៉ូលិសនឹងស៊ើបអង្កេតរកការពិត៕(CEN)
