ប្លង់នៃគម្រោងសាងសង់ពហុកីឡដ្ឋានខ្នាតអន្តរជាតិរបស់កម្ពុជា។ រូបថត យឺត ពន្លក
ភ្នំពេញៈ ពហុកីឡដ្ឋានរបស់កម្ពុជាខ្នាតអន្តរជាតិថ្មី ដែលប្រសិទ្ធិនាមថា «ពហុកីឡដ្ឋានជាតិមរតកតេជោ» ត្រូវបាន បញ្ចុះបឋមសិលានិងបើកការដ្ឋានសាងសង់នៅថ្ងៃសុក្រ ទី១២ ខែមេសានេះក្រោមអធិបតីភាពលោកនាយករដ្ឋមន្ត្រីហ៊ុន សែន។ ពហុកីឡដ្ឋានដ៏ទំនើបនេះ នឹងត្រូវប្រើរយៈពេលសាងសង់ ៩ ឆ្នាំ ចំណាយទឹកប្រាក់ប្រមាណជិត ៣៩ លានដុល្លារអាមេរិក ដែលនឹងអាចឲ្យកម្ពុជាទទួលធ្វើជាម្ចាស់ផ្ទះនៃការប្រកួត SEA GAME នៅឆ្នាំ២០២០ខាងមុខបាន។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) និងជាតំណាងគណ:កម្មការសាងសង់ ធ្លាប់បានប្រាប់ភ្នំពេញប៉ុស្តិ៍កាលពីខែមុនថា ពហុកីឡដ្ឋានជាតិថ្មី នេះត្រូវបានគូសប្លង់ដោយជនជាតិខ្មែរ និងតាមរចនាប័ទ្មខ្មែរថែមទៀតផង ដោយអាចផ្ទុកមនុស្សបានជាង១០ម៉ឺន នាក់ហើយមានបំពាក់តាំងពីប្រព័ន្ធភ្លើងគ្រប់គ្រាន់មានទីលានប្រកួត កីឡាបាល់ទាត់ បាល់បោះ បាល់ឱប ប៉េតង់ អត្តពលកម្ម ហែលទឹកដែលគោរពទៅតាមស្តង់ដារបច្ចេកទេសអន្ដរជាតិទាំងអស់។
លោកបានបញ្ជាក់ថា៖ «ក្រៅពីសក្តានុពលខាងលើ ពហុកីឡដ្ឋានមរតកតេជោមានកន្លែងអន្តេវេសិកដ្ឋានសម្រាប់កីឡាករ កីឡាការិនីហូបចុកស្នាក់នៅជាង៣០០នាក់ទៀតផង។
ពហុកីឡដ្ឋានជាតិនេះមានទីតាំងស្ថិតនៅក្នុងសង្កាត់បាក់ខែង ខណ្ឌឫស្សីកែវលើទំហំដីជាង ៨០ហិកតាដែលជាកម្មសិទ្ធិរបស់លោកឧកញ៉ាលី យ៉ុងផាត់ និងជាពហុកីឡដ្ឋានដ៏ទំនើបបម្រើឲ្យពហុវិស័យកីឡា។
