កម្មកររោងចក្រយ៉ុងវ៉ាធ្វើការតវ៉ាបិទផ្លូវជាតិលេខ២កន្លងមក។ រូបថត លីណា
ភ្នំពេញៈ ក្រសួងការងារ បានធ្វើការព្រមានដល់កម្មករនិយោជិតគ្រប់រោងចក្រកាត់ដេរ និងស្បែកជើង ដែលពាក់ព័ន្ធទាំងអស់សូមកុំធ្វើការតវ៉ាដោយបិទផ្លូវ បើពុំនោះទេ ក្រសួង និងអាជ្ញាធរ នឹងធ្វើការអនុវត្តយ៉ាងតឹងរ៉ឹងទៅលើកូដករទាំងនោះ។
លោក វង សូត រដ្ឋមន្រ្តីក្រសួងការងារបានថ្លែងបន្ទាប់ពីកិច្ចប្រជុំគណៈកម្មការ ប្រឹក្សាការងារ(LAC) លើការចុះហត្ថលេខា សម្រាប់ការដំឡើងប្រាក់ឈ្នួលអប្បបរមា ដល់កម្មករ កាលពីថ្ងៃសុក្រថាទាំងអស់គ្នា ត្រូវធ្វើការពិចារណាឲ្យបានល្អិតល្អន់មុនពេលធ្វើអ្វីមួយ ដើម្បីកុំឲ្យប៉ះពាល់ដល់សាធារណជន។
លោកបន្តថាការអង្គុយចរចាជាមួយគ្នា ជាមធ្យោបាយប្រសើរបំផុតក្នុងការស្វែងរកដំណោះស្រាយ។សេរីភាពរបស់ កម្មករអាចធ្វើបានទៅតាមអ្វីដែលច្បាប់បានចែងប៉ុន្តែថ្មីៗ នេះ កម្មករ មិនបានគោរពច្បាប់ទេ។
លោកវង សូត បញ្ជាក់ថា៖ «ខ្ញុំមានការសោកស្តាយនៅពេលដែលកម្មករកាត់ដេរ មានបញ្ហា ហើយពួកគេ បានចាប់ផ្តើមបិទផ្លូវ។ ថាតើវាត្រឹមត្រូវឬអត់ (ក្នុងការធ្វើដូច្នេះ)?»។ លោកបានចោទសួរថា នៅពេលដែលពួកគេ មានជម្លោះ តើហេតុអ្វីបានជាពួកគេមិនចរចាគ្នាដោយសន្តិវិធី ប៉ុន្តែបែរជាបិទផ្លូវសាធារណៈទៅវិញ។
លោកវង សូតបានមានប្រសាសន៍បន្តថា៖«ប្រសិនបើយើងអនុញ្ញាតឲ្យធ្វើទៅតាម អ្វីដែលគេចង់ នោះវាដូចជាសង្គមមួយមិនមានច្បាប់អ៊ីចឹង»។
កម្មករនិងសហជីពបាននិយាយជាបន្តបន្ទាប់មកថាការធ្វើការតវ៉ា ឬការបិទផ្លូវធ្វើឡើងដោយសារតែគ្មានជម្រើសប៉ុណ្ណោះ ខណៈដែលការតវ៉ាបន្តអូសបន្លាយពីមួយថ្ងៃទៅមួយថ្ងៃ ប៉ុន្តែភាគីរោងចក្រ និងស្ថាប័នពាក់ព័ន្ធមិនបានអើពើយកចិត្តទុកដាក់ដោះស្រាយ។
អតីតកម្មករនៅរោងចក្រយ៉ុងវ៉ាម្នាក់នៅក្រុងតាខ្មៅ ខេត្តកណ្តាល ដែលធ្លាប់ធ្វើការតវ៉ាបិទផ្លូវកន្លងមកបាននិយាយកាលពីថ្ងៃ អាទិត្យថា កម្មករមិនចង់ធ្វើការតវ៉ាបិទផ្លូវទេ ប៉ុន្តែពួកគេ គ្មានជម្រើសដើម្បីបង្ខំឲ្យអាជ្ញាធរឬថៅកែធ្វើការដោះស្រាយបញ្ហា របស់ពួកគេ។
កម្មការិនី ដែលបដិសេធមិនបញ្ចេញឈ្មោះរូបនេះ លើកឡើងថា៖«ពួកគេ(មន្រ្តីរដ្ឋាភិបាល) គិតថា យើងចង់ឈរក្រោមកម្ដៅថ្ងៃដើម្បីបិទផ្លូវណាស់ឬ? តាមពិតទៅយើងមិនចង់ទាល់តែសោះ ប៉ុន្តែវាជាជម្រើសចុងក្រោយរបស់យើងដើម្បីបង្ខំឲ្យពួកគេស្វែងរក ដំណោះស្រាយឲ្យយើង»។នាងបន្តថានាង ប្រាកដណាស់ដែលថា កម្មករ នឹងនៅតែបិទផ្លូវទោះបីមានបញ្ជាក៏ដោយ។ ដូចនៅរោងចក្រយ៉ុងវ៉ាអ៊ីចឹង។ ខ្ញុំ គិតថា ប្រសិនបើយើងមិនបិទផ្លូវទេយើងនឹងមិនទទួលបានប្រាក់ខែរហូតមក ដល់ពេលនេះ»។
កាលពីថ្ងៃសុក្រសមាជិក LAC បានចុះហត្ថលេខាលើការដំឡើងប្រាក់ឈ្នួលអប្បបរមាសម្រាប់កម្មករដែល ដំឡើងពី ៦១ ដុល្លារ ដល់ ៨០ ដុល្លារក្នុងមួយខែ ហើយវានឹងមានប្រសិទ្ធភាពចាប់ពីខែឧសភានេះទៅ៕ NR(POSTKHMER)
