បើករថយន្ត ងងុយដេក ជ្រុលចង្កូត ទៅបុករទេះ លក់លតឆា មីឆា និង ជ្រុលទៅបុកម៉ូតូ ចំនួន ៤គ្រឿង នៅតាមបណ្ដោយ ផ្លូវលេខ២៧១

ភ្នំពេញៈ រថយន្តធន់ធ្ងន់មួយគ្រឿង ដោយម្ចាស់រថយន្តបើកបរទាំងអាការ ងងុយដេក ក៏ជ្រុលចង្កូតទៅបុកនឹងរទេះលក់លតឆា មីឆា និងជ្រុល ទៅបុកម៉ូតូចំនួន ៤គ្រឿង ដែលគេចតចោល នៅខាងមុខហាងកាហ្វេ យីហោ សុខ ណា តាមបណ្ដោយ ផ្លូវលេខ២៧១ សង្កាត់ទំនប់ទឹក ខណ្ឌ ចំការមន រាជធានីភ្នំពេញ កាលពីវេលាម៉ោង ៣ និង ១៥នាទី រសៀល ថ្ងៃទី២ ខែមេសា ឆ្នាំ២០១៣ តែមិនបណ្ដាលឲ្យមានមនុស្សណាម្នាក់ រងគ្រោះថ្នាក់នោះទេ ។
តាមសម្ដីរបស់សមត្ថកិច្ចមូលដ្ឋាន បានឲ្យដឹងថា មុនពេលកើតហេតុ គេឃើញរថយន្តបង្កខាងលើ ម៉ាកFUSO ពណ៌ស ពាក់ស្លាកលេខ ភ្នំពេញ 3B-5072 បើកបរតាមបណ្ដោយផ្លូវ លេខ២៧១ ក្នុងទិសដៅពីលិចមកកើត លុះមកដល់ចំណុចកើតហេតុ ដោយមានអាការ ងងុយដេកមួយផាំង ក៏រេចង្កូតទៅបុកនឹងរទេះលក់មីឆា លតឆាមួយ និងជ្រុលទៅបុកម៉ូតូចំនួន ៤គ្រឿងទៀត ដែលចតចោល នៅខាងមុខហាងកាហ្វេ យីហោ សុខណា រួមមានទី១ម៉ាក សេ១២៥ ពណ៌ខ្មៅ ពាក់ស្លាកលេខ តាកែវ 1E-0413 ទី២ ម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ 1D-4396 ទី៣ ម៉ាកស្កុបពី ពណ៌ក្រហម ពាក់ស្លាក លេខ ភ្នំពេញ 1BP-9467 និងទី៤ ម៉ាកសេ១២៥ ពណ៌ក្រហម ពាក់ស្លាកលេខ សៀមរាប 1F- 9032 តែមិនបណ្ដាល ឲ្យមនុស្ស ណាម្នាក់រងគ្រោះថ្នាក់នោះទេ ។
បច្ចុប្បន្ន រថយន្តបង្កហេតុខាងលើ និងម៉ូតូ ត្រូវបានសមត្ថកិច្ច យកទៅកាន់ការិយាល័យ នគរបាលចរចរណ៍ផ្លូវគោក រាជធានីភ្នំពេញ ដើម្បីដោះ ស្រាយនាពេលក្រោយ ៕(DAPNEWS)