បើករថយន្ដ បុករបាំង ចែកទ្រូងផ្លូវ បាក់អស់ ១០ផ្ទាំង

ភ្នំពេញ ៖ បុរសម្នាក់ បានបើករថយន្ដបុករបាំងដែក ចែកទ្រូងផ្លូវ បណ្ដាលឱ្យបាក់អស់ចំនួន ១០ផ្ទាំង នៅលើកំណាត់ផ្លូវ សហព័ន្ធរុស្ស៊ី មុខវិទ្យាល័យបុរី១០០ខ្នង សង្កាត់ទឹកថ្លា ខណ្ឌសែនសុខ កាលពីវេលា ម៉ោង ៣និង៥០នាទី រសៀលថ្ងៃទី២០ ខែសីហា ឆ្នាំ២០១៣នេះ រួចហើយម្ចាស់រថយន្ដ បានបើកគេច ចូលទៅក្នុងបុរីសន្ដិភាព នៅក្បែរស្ថានីយទូរទស្សន៍អាស៊ីអាគ្នេយ៍ ប៉ុន្ដែត្រូវបានសមត្ថកិច្ច ឃាត់បាននៅ ទីនោះ ។
មន្ដ្រីនគរបាលចរាចរជើងគោក រាជធានីភ្នំពេញ បានឱ្យដឹងថា មុនពេលកើតហេតុ អ្នកបើក រថយន្ដកូរ៉ូឡា ពាក់ស្លាកលេខ ភ្នំពេញ ២អេស ៤១៩០ ដែលមានឈ្មោះ ជុំ ស៊ីឡែន អាយុជាង ៤០ឆ្នាំ រស់នៅភូមិភ្នំតូច ឃុំត្បូង ស្រុករលាប្អៀរ ខេត្ដកំពង់ឆ្នាំង បានធ្វើដំណើរតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត លុះមកដល់ចំណុចកើតហេតុ បានរេចង្កូត ទៅបុករបាំងដែកចែកទ្រូងផ្លូវ បណ្ដាលឱ្យបាក់អស់ចំនួន ១០ផ្ទាំង ។
ក្រោយបុកហើយ អ្នកបើករថយន្ដ បានបើកចូលទៅបុរីសន្ដិភាព ក៏ត្រូវសមត្ថកិច្ចដេញតាមពីក្រោយ ឃាត់នៅទីនោះតែម្ដង។ បច្ចុប្បន្នរថយន្ដបង្ក ត្រូវបានកម្លាំងនគរបាលចរាចរ ខណ្ឌសែនសុខ ស្ទូចប្រគល់ឱ្យកម្លាំងនគរបាល ចរាចរជើងគោក រាជធានីភ្នំពេញ ដើម្បីឱ្យម្ចាស់រថយន្ដ ចូលខ្លួនដោះស្រាយ ៕(DAPNEWS)