រាជធានីភ្នំពេញ ៖
អគ្គិភ័យបានឆាបឆេះផ្សារទួលសង្កែ យ៉ាងសន្ធៅសន្ធៅ
កាលពីវេលាម៉ោង ៦ល្ងាច ថ្ងៃទី១០ សីហា ២០១៣
ស្ថិតក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ
ដែលអណ្តាតភ្លើងបានឆេះខ្លាំងរាលដាលដល់ផ្ទះល្វែងក្បែរនោះ ៣ ទៅ
៤ល្វែង ខណៈដែលរថយន្តពន្លត់អគ្គិភ័យជាច្រើនគ្រឿង
និងរថយន្តប៉ូលិស ប៉េអឹម ចេញអន្តរាគមន៍បាញ់ពន្លត់ភ្លើង
ហើយនៅវេលាម៉ោង ៧ និង ២៥នាទី អគ្គិភ័យត្រូវបានរលត់ជាស្ថាពរ ។
តាមប្រភពព័ត៌មាន បានឱ្យដឹងថា អគ្គិភ័យនេះ
បានផ្តើមឆេះចេញពីផ្ទះលេខ១០៨ ផ្លូវលេខ៦៨
ជាផ្ទះបើករបរជួលជុលទូរស័ព្ទ ដែលនៅខាងជើងផ្សារទួលសង្កែ
មានម្ចាស់ឈ្មោះ ហោ គឹមហេង ភេទប្រុស អាយុ ៦០ឆ្នាំ
ខណៈដែលករណីឆេះពុំទាន់ដឹងថា បណ្តាលមកពីអ្វីនៅឡើយទេ ។
នៅក្នុងហេតុការណ៍អគ្គិភ័យនេះផងដែរ បានបំផ្លាញផ្ទះអស់ ៥ល្វែង
និងឆេះតូបលក់ដូរ ១កន្លែង ៕(កោះសន្តិភាព)
