ទើបតែធ្វើជាពិធីករនៅលើឆាកតន្ត្រីក្នុងកម្មវិធីអាណាចក្រ
តារាកាលពីថ្ងៃទី១៥ ខែសីហា ឆ្នាំ២០១៣ សោះ ស្រាប់តែនៅថ្ងៃទី១៨
សីហា កន្លងមកនេះ ពិធីករបែបកំប្លែងលោក ដួង សុខគា
បានរត់ទៅបួសយ៉ាងប្រញាប់ប្រញាល់នៅក្នុងវត្តមួយនៅខេត្តតាកែវ។
ទស្សនិកជនបានលើកឡើងជាចម្ងល់ថា តើ ដួង សុខគា
រត់ទៅបួសព្រោះអត់បានពានអាណាចក្រតារាហ្នឹងគេ?
ឬក៏តារារូបនេះមានរឿងអ្វីខូចចិត្ត?កូនចៅនៅសំអាងការរបស់ ដួង សុខគា បានឲ្យដឹងថា លោក ដួង សុខគា បានរៀបចំពិធីបំបួសនៅក្នុងវត្តប្រាសាទនាងខ្មៅ ដែលស្ថិតនៅក្បែរនឹងស្រុកកំណើតរបស់លោកស្ថិតនៅក្នុងស្រុកសំរោង ខេត្តតាកែវ កាលពីថ្ងៃទី១៨ ខែសីហា។ តែយ៉ាងណា កូនចៅដែលលើកទូរស័ព្ទរូបនេះមិនបានបញ្ជាក់ពីមូលហេតដែល ដួង សុខគា ចេញបួសនោះទេ។
ដោយឡែកតារាកំប្លែងមានឈ្មោះល្បីនាយ ក្រូច ដែលបានចូលរួមក្នុងពិធីបំបួសលោក ដួង សុខគា បានឲ្យដឹងថា៖«គាត់បួសនៅជិតផ្ទះគាត់ដែរហ្នឹង ហើយពិធីបំបួសនោះគឺធ្វើធំខ្លាំងណាស់ មានស្ទើរគ្រប់ពិធីមានបុកល័ក្ខ ធ្វើធ្មេញ ពិធីប្រលែងសត្វ ជាដើម»។
តារារូបនេះបញ្ជាក់ថា៖«គាត់បួស៧ថ្ងៃ តែខ្ញុំមិនដឹងច្បាស់ដែរ ថា គាត់បួសសងគុណ បួសលាបំណន់ ឬក៏បួសនៅពេលគាត់រកស៊ីមានបាននោះទេ ព្រោះគាត់មានតែម្តាយប៉ុណ្ណោះ»។(POSTKHMER)
