រាជធានីភ្នំពេញ ៖
អ្នកដើរកម្សាន្តក៏ដូចជាភ្ញៀវទេសចរបរទេស
បានសម្តែងការព្រួយបារម្ភជាខ្លាំងពីសុវត្ថិភាពរបស់ពួកគេក្នុង
ការដើរកម្សាន្តនៅផ្សាររាត្រីនាពេលយប់
ជាពិសេសនៅពេលដើរឆ្លងកាត់សួនច្បារផ្សារចាស់ម្តងៗ
ពីព្រោះនៅទីនោះក្រុមស្ទាវហិតកាវតែងនាំគ្នាឡោមព័ទ្ធ
វាយប្លន់យកទ្រព្យសម្បត្តិជាប់ខ្លួនរបស់ពួកគេជាញឹកញាប់ ។
ម្ចាស់ហាងកាហ្វេមួយកន្លែង
ស្ថិតនៅខាងលិចផ្សារចាស់តាមបណ្តោយផ្លូវលេខ១០៨
ស្ថិតនៅក្នុងភូមិ៥ សង្កាត់វត្តភ្នំ
ខណ្ឌដូនពេញបាននិយាយឱ្យកោះសន្តិភាពដឹងថា
ចាប់ពីម៉ោង៧យប់រហូតដល់វេលាទៀបភ្លឺ
តែងតែមានក្រុមស្ទាវដែលមានអាយុចាប់ពីជាង១០ឆ្នាំឡើងទៅបាន
ប្រមូលផ្តុំគ្នានៅលើសួនច្បារខាងលិចផ្សារចាស់ផ្លូវលេខ១០៨
ស្ថិតក្នុងសង្កាត់វត្តភ្នំ មានប្រុសមានស្រីប្រហែលជិត២០នាក់
ពពាក់ពពូននាំគ្នាឈរហិតកាវយា៉ងអនាធិបតេយ្យ
ហើយអ្នកខ្លះនាំគ្នាអង្គុយផឹកស្រាស្រែកឡូឡាហាក់ដូចជាមិនញញើត
សមត្ថកិច្ចមូលដ្ឋានឡើយ ។
ក្រុមស្ទាវទាំងនោះបានកើតមានឡើងតាំងពីមុនបោះឆ្នោតមកម៉្លេះ
ប៉ុន្តែមិនឃើញអាជ្ញាធរមកលុបបំបាត់ទេ
ចេះតែបណ្តែតបណ្តោយរហូតមក ។
ជាមួយគ្នានេះក៏មានស្ត្រីចាស់ៗនាំគ្នាដេកក្រោមដើមត្របែកព្រៃ
នៅពេលថ្ងៃរហូតដល់យប់ទៀតផង ជាទីតាំងអាក្រក់មើលបំផុត
និងគួរឱ្យខ្លាច ។ ម្ចាស់ហាងកាហ្វេដដែលនោះបន្តថា
នៅពេលយប់ពួកគេបានចែកផ្លូវគ្នាដើររកស៊ីរៀងៗខ្លួន
ខ្លះឈរនៅតាមមាត់ទន្លេ ហើយខ្លះទៀតឈរនៅលើសួនច្បារផ្សារចាស់
រង់ចាំឱ្យតែមានជនបរទេសក៏ដូចជាអ្នកដើរកម្សាន្តនាពេលយប់ដើរ
ឆ្លងកាត់ទីនោះ
ក្រុមស្ទាវទាំងនោះនឹងប្រើល្បិចសុំលុយឬដើរតាមធ្វើជាសុំបារី ។
ឆ្លៀតឱកាសនោះពួកគេក៏យកកាំបិតភ្ជង់ប្លន់យកកាបូបលុយ
ទូរស័ព្ទដៃ និងសម្ភារផ្សេងៗទៀតដែលអាចលក់យកលុយបាន ។
ក្រុមស្ទាវហិតកាវទាំងនោះតែងតែធ្វើសកម្មភាព
នៅពេលយប់ ចាប់ពីម៉ោង១១យប់ឡើងទៅ ។ ជាក់ស្តែង
កាលពីយប់ថ្ងៃទី១០ សីហា កន្លងមកនេះ
ជនបរទេសពីរនាក់ប្តីប្រពន្ធត្រូវបានក្រុមស្ទាវមានគ្នា៥នាក់
បានចោមរោមពីមុខពីក្រោយគំរាមប្លន់យកកាបូបស្ពាយ និងទូរស័ព្ទ ។
ដោយមានការភ័យខ្លាចខ្លាំងពេក
ជនបរទេសទាំងពីរនោះក៏បាននាំគ្នារត់ឆ្ពោះទៅផ្សាររាត្រី
តែមិនបានដាក់ពាក្យបណ្តឹងទៅនគរបាលនោះទេ ។
ម្ចាស់ហាងកាហ្វេដដែលបានបញ្ជាក់ថា
ទាំងអ្នករកស៊ីក៏ដូចជាប្រជាពលរដ្ឋនៅខាងលិចផ្សារចាស់ឱ្យតែ
យប់ជ្រៅបន្តិច
មិនហា៊នដើរកាត់លើសួនច្បារផ្សារចាស់តាមបណ្តោយផ្លូវលេខ១០៨នេះ
ទេ ពីព្រោះខ្លាចក្រុមស្ទាវវាយប្លន់យកទ្រព្យសម្បត្តិ ។
ក្នុងមួយខែៗយា៉ងតិចណាស់ក៏កើតអំពើប្លន់នៅចំណុចខាងលើមិនក្រោម
ពី១០លើកទេ
ហើយកម្រឃើញអាជ្ញាធរមូលដ្ឋានចុះអន្តរាគមន៍ទាន់ពេលវេលាណាស់
មិនដឹងទៅណាអស់ ។
លោក ណាង ហេង
មន្ត្រីនគរបាលក្រសួងមហាផ្ទៃបាននិយាយថា
តាមលោកសង្កេតឃើញមានក្មេងអនាថា ក្មេងសុំទាន ក្មេងរើសអេតចាយ
និងយុវជនស្ទាវប្រុសស្រីបាននាំគ្នាហិតកាវ ផឹកស្រារាល់ថ្ងៃ
ទាំងព្រឹក ទាំងយប់
នៅលើសួនច្បារខាងលិចផ្សារចាស់តាមផ្លូវលេខ១០៨
ស្ថិតក្នុងសង្កាត់វត្តភ្នំ
គឺហាក់បីដូចជាទីនោះជាមជ្ឈមណ្ឌលជក់ថ្នាំ និងហិតកាវទៅហើយ ។
នៅពេលយប់ជនទាំងនោះធ្វើសកម្មភាពប្លន់ដោយមិនរើសមុខ ។
លោកបន្តថា នៅពេលយប់មានភ្ញៀវទេសចរអន្តរជាតិ
និងប្រជាពលរដ្ឋជាច្រើនដែលដើរឆ្លងកាត់ទៅផ្សាររាត្រី
ត្រូវប្រឈមមុខនឹងបញ្ហានេះ
ដែលធ្វើឱ្យប៉ះពាល់យា៉ងធ្ងន់ធ្ងរលើវិស័យទេសចរណ៍ទៀតផង ។
កន្លងមកអំពើប្លន់អ្នកដំណើរដើរកម្សាន្តនៅមាត់ទន្លេផ្សារចាស់
ដោយស្នាដៃក្រុមស្ទាវហិតកាវវាយប្លន់កើតមានជារឿយៗ
មិនដែលឃើញសមត្ថកិច្ចមូលដ្ឋានបង្ក្រាបបានដោយខ្លួនឯងណាស់
បើបង្ក្រាបបានគឺដោយសារអ្នករងគ្រោះដែលក្លាហានចាប់ឱ្យតែ
ប៉ុណ្ណោះ ។
តើឯណាទៅភូមិ-សង្កាត់មានសុវត្ថិភាពរបស់អាណាចក្រខណ្ឌដូនពេញ ?
ជាមួយនឹងបញ្ហាអសកម្មនេះ
ប្រជាពលរដ្ឋក៏ដូចជាមន្ត្រីរាជការដែលមានលំនៅឋានក្បែរសួន
ច្បារខាងលិចផ្សារចាស់សំណូមពរសុំឱ្យលោកឧត្តមសេនីយ៍ស្នងការនគរ
បាលរាជធានីភ្នំពេញមេត្តាជួយឆ្កឹះនាយនគរបាលប៉ុស្តិ៍រដ្ឋបាល
វត្តភ្នំ
និងអាជ្ញាធរសង្កាត់ឬក៏លោកអធិការខណ្ឌឱ្យលុបបំបាត់ភាពអនា
ធិបតេយ្យនៅចំណុចសួនច្បារផ្សារចាស់ផ្លូវលេខ១០៨
សង្កាត់វត្តភ្នំ ខណ្ឌដូនពេញនេះផង ។
អ្នករស់នៅក្បែរនោះឃើញទិដ្ឋភាពអាក្រក់នេះ
មានការភ័យខ្លាចខ្លាំងណាស់
ឱ្យតែពេលយប់គឺនាំគ្នាមិនហា៊នចេញពីក្នុងផ្ទះឡើយ ។
បើលោកអធិការខណ្ឌដូនពេញមិនជឿទេ យប់ណាមួយលោកតឺនុយហំបន្តិច
ហើយដើរម្នាក់ឯងសាកមើល បើមិនរត់បាតជើងសព្រាតទេ ហា៊នភ្នាល់ ៕(KOHSANTEPHEAP)
