លោកឧត្តមសេនីយ៍ គៀត ច័ន្ទថារិទ្ធ អ្នកនាំពាក្យស្នងការដ្ឋាននគរបាលជាតិថ្លែងថា ទោះបីមានការអំពាវនាវពីគណបក្សប្រជាជនកម្ពុជា ឲ្យចាត់វិធានការវែកមុខអ្នកប្រឌិតខ្សែអាត់សំឡេង ក៏នគរបាលមិនទាន់ចាប់ផ្តើមធ្វើការដែរ។
លោកថ្លែងថា៖ «ខ្ញុំសាកសួរទៅអ្នកជំនាញមានសមត្ថកិច្ចហើយ ពួកគេមិនទាន់ដំណើរការទេ ហើយក៏មិនទាន់មានបញ្ជាពីថ្នាក់លើដែររឿងនេះ ទោះគណបក្សអំពាវនាវក៏ដោយ»។ លោកបន្តថា ៖ «ណាមួយ មិនទាន់មានពាក្យបណ្តឹងពីគណបក្សប្រជាជនកម្ពុជាទេ»។
ទោះយ៉ាងណាលោក ជៀម យាប តំណាងរាស្ត្រមកពីគណបក្សប្រជាជនកម្ពុជា បានប្រាប់ភ្នំពេញប៉ុស្តិ៍នៅដើមសប្តាហ៍នេះថា មេធាវីបក្សនឹងសិក្សាពីផ្លូវច្បាប់ ដើម្បីដាក់ពាក្យប្តឹងឲ្យអាជ្ញាធរវែកមុខអ្នកប្រព្រឹត្តការ កាត់តសំឡេងនេះ។
កាលពីថ្ងៃ១៩ សីហា គណបក្សប្រជាជនកម្ពុជា បានថ្លែងក្នុងសេចក្តីថ្លែងការណ៍ប្រតិកម្មអ្នកកាត់សម្លេងលោកហ៊ុន សែន ដែលថ្លែងក្នុងពិធីមួយនៅខេត្តព្រៃវែង ហើយស្នើឲ្យសមត្ថកិច្ចចាត់វិធានការចំពោះអ្នកបំពានច្បាប់។
សំឡេងលោកហ៊ុន សែនត្រូវបានគេបង្ហោះដាក់បណ្តាញហ្វេសប៊ុក កាលពីចុងសប្តាហ៍នេះ ហាក់ដូចបង្ហាញថាខ្លួនទទួលស្គាល់ថាគណបក្សប្រជាជនកម្ពុជាចាញ់ឆ្នោត ដែលតាមពិត ត្រូវបានគេរកឃើញថា ជាប្រសាសន៍ដែលលោកហ៊ុន សែន រំលឹកពីបន្ទូលព្រះអង្គម្ចាស់ស៊ីសុវត្ថិធម្មិកោ ដែលនិយាយឲ្យបក្សប្រជាជនចាញ់ឆ្នោត។
ជាក់ស្តែងលទ្ធផលបណ្តោះអាសន្ននៃការបោះឆ្នោតឆ្នាំ២០១៣នេះ បង្ហាញថា បក្សប្រជាជនទទួលបាន៦៨អាសនៈ និងបក្សសង្គ្រោះជាតិបាន ៥៥ អាសនៈ ប៉ុន្តែនៅមានបញ្ហាជាប់គាំងនយោបាយមិនទាន់ដោះស្រាយចប់នៅឡើយ ខណៈបក្សប្រឆាំងទាមទារឲ្យស៊ើរើភាពមិនប្រក្រតីឡើងវិញ។ តាមប្រតិទិន គណៈកម្មាធិការជាតិរៀបចំការនឹងត្រូវផ្សព្វផ្សាយលទ្ធផលផ្លូវការនៅ ថ្ងៃទី៨កញ្ញាខាងមុខនេះ៕(POSTKHMER)
