អ៊ីតាលីៈ កប៉ាល់យក្ស បើកឡើងគោក សម្លាប់មនុស្ស ៦នាក់

យ៉ាងហោចណាស់ មនុស្ស ៦នាក់បានស្លាប់ នៅព្រឹកព្រហាម ថ្ងៃសៅរ៍ ទី១៤ ខែមករា ឆ្នាំ ២០១២នេះ បន្ទាប់ពីនាវាទេសចរណ៍ ខ្នាតធំមួយ បានបើកខុសទិសឡើងលើដីគោក ស្ថិតនៅឆ្នេរសមុទ្ររបស់ ប្រទេសអ៊ីតាលី ដែលបានបង្ខំឲ្យអាជ្ញាធរ តាមតំបន់ឆ្នេរជម្លៀសមនុស្សជាង ៣០០០នាក់ចេញពីតំបន់នោះ។ នេះបើតាមការផ្សាយរបស់សារព័ត៌មានអ៊ីតាលី។

តាមព័ត៌មានពីគេហទំព័រ Channel News Asia បានឲ្យដឹងទៀតថា នាវា កូស្តា កង់កូឌីយ៉ា ជានាវាទេសចរណ៍ ដែលធ្វើដំណើរនៅលើសមុទ្រមេឌីទែរ៉ាណេ ដោយពេលកំពុងបើកបរនោះ វាបានប៉ះទង្គិចជាមួយនឹងថ្មប៉ប្រះទឹក នៅជិតតំបន់ អ៊ីសូឡា ឌែល គីកលីអូ។
មន្ត្រីប្រចាំតំបន់ កើតហេតុបានរាយការណ៍ថា នៅពេលនេះ គេខ្លាចថា អ្នករងគ្រោះអាចនឹងមានថែមទៀត ដោយសារតែអ្នកដំណើរមួយចំនួនពិបាក នឹងជម្លៀសចេញពីនាវាណាស់។

គួរបញ្ជាក់ថា ក្នុងចំណោមអ្នកដំណើរដែលស្លាប់ទាំង ៦នាក់នោះ មានម្នាក់អាយុជាង ៧០ឆ្នាំ ដែលគាត់បានស្លាប់ដោយសារតែ គាំងបេះដូងពេលនាវាបើកឡើងច្រាំង ហើយគាត់បាន លោតចុះទៅក្នុងទឹកសមុទ្រ ដែលត្រជាក់ដូចទឹកកក។ ក៏មានមនុស្សមួយចំនួនទៀត ដែរដែលបានទទួលរងរបួសនៅក្នុងហេតុការណ៍នោះ។
ចំពោះអ្នកដំណើរ ៣២០០នាក់ និងពួកកម្មករកប៉ាល់ ប្រមាណជា ១០០នាក់ទៀត ត្រូវបានគេ ជម្លៀសចេញរួចរាល់ហើយ ហើយមនុស្សជាង ២០០នាក់ទៀត មិនទាន់ត្រូវបានគេសង្គ្រោះ ចេញពីនាវានៅឡើយទេ។ គួរបញ្ជាក់ជាថ្មីថា នាវាដែលកើតហេតុនោះមានប្រវែង ២៩០ ម៉ែត្រ ជានាវាទេសចរណ៍ លំដាប់យក្ស នៅលើពិភពលោក។