ភ្នំពេញ:
អគ្គីភ័យបានឆាបឆេះស្ទូឌីយោស្ថានីយទូរទស្សន៍ស៊ីធីអិន នៅវេលាម៉ោង
១០ ព្រឹកថ្ងៃទី២៤ ខែកុម្ភៈ ឆ្នាំ២០១៣ ស្ថិតនៅផ្លូវជាតិលេខ៥
ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។
បន្ទាប់ពីមានអន្តរាគមន៍ពីក្រុមរថយន្តពន្លត់អគ្គីភ័យរាជធានីភ្នំពេញ
និងរថយន្តពន្លត់អគ្គីភ័យ របស់ស្ថាប័នពាក់ព័ន្ធ ប្រមាណជារយៈពេល ១៥
នាទីក្រោយមក ភ្លើងបានរលត់ទាំងស្រុងវិញ។
ក្នុងនោះមានរថយន្តរបស់អង្គភាពបង្ការ
និងពន្លត់អគ្គីភ័យនគរបាលរាជធានីភ្នំពេញ ចំនួន ៦គ្រឿង
និងរថយន្តរបស់ក្រុមហ៊ុនសូគីម៉ិច ២គ្រឿង
ហើយប្រើប្រាស់ទឹកអស់ចំនួន ៤រថយន្ត។
ស្ទូឌីយោដែលឆេះ
នោះ ជាកន្លែងលេងហ្គេម មានបីប្រភេទ ដូចជា
កន្លែងលេងហ្គេមជ្រែកជញ្ជាំង
ហ្គេមតើអ្នកឆ្លាតជាងសិស្សថ្នាក់ទី៥ឬទេ
និងកន្លែងលេងហ្គេមអ្នកនឹងក្លាយជាសេដ្ឋី។
សម្ភារៈនៅក្នុងកន្លែងលេងហ្គេមមានបីប្រភេទនោះ
ត្រូវបានភ្លើងឆេះអស់ទាំងស្រុងតែម្តង។
ហេតុការណ៍នេះមិនមានមនុស្សរងគ្រោះថ្នាក់នោះទេ។
ទោះជាយ៉ាងណាក៏ដោយ មិនទាន់មានសេចក្តីរាយការណ៍ពីសមត្ថកិច្ចជំនាញ
នៃហេតុការណ៍នេះទេ ហើយទំហំនៃការខូចខាតក៏គេពុំទាន់ដឹងដែរ
ពោលគឺស្ថិតក្នុងដំណាក់កាលស្រាវជ្រាវ៕ .
