លោកឧបនាយករដ្ឋមន្រី្តសុខ
អាន លោកឧបនាយករដ្ឋមន្រី្តទៀ បាញ់ លោកឧបនាយករដ្ឋមន្រី្តគង់ សំអុល
អញ្ជើញជាអធិបតីរៀបចំព្រះរាជពិធីដង្ហែព្រះបរមរតនកោដ្ឋ នៅពេលសាកល្បង
ព្រះរាជពិធីដង្ហែព្រះបរមរតនកោដ្ឋ នៅពេលសាកល្បងនេះ មានអ្នកចូលរួមប្រមាណជិត ២.០០០ នាក់ ដែលមាន ១១ ផែន។ ការចូលរួមដឹកនាំបញ្ជា រៀបចំក្បួន រួមមាន សម្តេចចៅហ្វាវាំង ឧបនាយរដ្ឋមន្ត្រី គង់ សំអុល រដ្ឋមន្ត្រីព្រះបរមរាជវាំង លោកឧបនាយករដ្ឋមន្ត្រី សុខ អាន លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ លោកឧបនាយករដ្ឋមន្ត្រី ញឹក ប៊ុនឆៃ លោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស លោក មិន ឃិន រដ្ឋមន្ត្រីក្រសួងធម្មការ និងសាសនា និងជាប្រធានគណៈកម្មាធិការជាតិ រៀបចំបុណ្យជាតិ និងអន្តរជាតិ លោក ហ៊ឹម ឆែម រដ្ឋមន្ត្រីក្រសួងវប្បធម៌ និងលោក ឡេង ប៉េងឡុង អគ្គលេខាធិការរដ្ឋសភាជាតិ។
នៅក្នុង ការរៀបចំព្រះរាជពិធីដង្ហែសាកល្បងលើកទី១នោះ មានផែនមន្ត្រីរាជការ និស្សិតសិស្ស ប្រជាពលរដ្ឋ ទាហាន កងរាជអាវុធហត្ថ នគរបាលជាតិ និងយុវជនកាយឫទ្ធិ ជាដើម។
រហូតមកដល់ព្រឹកម៉ោង ៩ និង ៣០ នាទី ការរៀបចំសាកល្បង ក្បួនដង្ហែព្រះបរមសព នៅបន្តឈរ ចាប់ពីតុលាការកំពូល មុខព្រះបរមរាជវាំង រហូតដល់មុខវត្តឧណ្ណាលោម ដោយមិនទាន់ដើរដង្ហែ តាមផែនការដែលបានគ្រោងទុកនៅឡើយទេ។
សេចក្តីប្រកាសព័ត៌មាន របស់សាលារាជធានីភ្នំពេញ កាលពីថ្ងៃទី១៧ ខែមករា ឆ្នាំ២០១៣ បានឲ្យដឹងថា ព្រះរាជពិធីដង្ហែសាកល្បងព្រះបរមសព ព្រះករុណា ព្រះបរមកោដ្ឋ លើកទី១ នៅថ្ងៃទី១៩ ខែមករា ឆ្នាំ២០១៣ និងលើកទី២ នៅថ្ងៃទី២៦ ខែមករា ឆ្នាំ២០១៣ ត្រូវចាប់ផ្តើមដង្ហែចេញពីវាលព្រះមេរុ ឆ្ពោះទៅផ្លូវព្រះអង្គដងកើ តាមតិរវិថីព្រះស៊ីសុវត្ថិ ធ្វើដំណើរត្រង់ រហូតដល់ផ្លូវលេខ៩៤ រួចបត់ឆ្វេង ហើយធ្វើដំណើរជុំវិញរង្វង់មូលរមណីយដ្ឋានវត្តភ្នំ ទៅមហាវិថីព្រះនរោត្តម រួចធ្វើដំណើត្រង់ ដល់រង្វង់មូលវិមានឯករាជ្យ ហើយបត់ឆ្វេង ដោយឆ្លងកាត់មហាវិថីព្រះសីហនុ ហើយបត់ឆ្វេង តាមមហាវិថីសម្តេចសុធារស ចូលវាលព្រះមេរុវិញ។
ដើម្បីឲ្យការ ដង្ហែសាកល្បងនេះ បានប្រព្រឹត្តទៅដោយរលូន សាលារាជធានីភ្នំពេញ បានប្រកាសជូនដំណឹង កាលពីថ្ងៃទី១៧ ខែមករា ឆ្នាំ២០១៣ ដោយធ្វើការបិទផ្លូវ សំរួលសកម្មភាពចរាចរបណ្តោះអាសន្ន នៅចំណុចផ្លូវខាងលើ ដែលក្បួន ត្រូវដង្ហែ នៅថ្ងៃទី១៩ ខែមករា ឆ្នាំ២០១៣ ចាប់ពីម៉ោង ៨ ព្រឹក រហូតដល់ម៉ោង ១២ ថ្ងៃត្រង់។
ផុត រយៈពេលកំណត់នេះ នឹងដាក់ឲ្យធ្វើចរាចរណ៍ជាប្រក្រតីឡើងវិញ។ ហេតុនេះ សូមសាធារណជនទាំងអស់ មេត្តាជ្រាប និងធ្វើការពង្វាងចរាចរពីទីតាំង ផ្លូវមុខព្រះបរមរាជវាំង ផ្លូវតាមជួរមាត់ទន្លេ នៅបរិវេណវត្តភ្នំ ផ្លូវព្រះនរោត្តម ចាប់ពីវត្តភ្នំ ទៅវិមានឯករាជ្យ ផ្លូវពីវិមានឯករាជ្យ ទៅមាត់ទន្លេ កាត់តាមស្តូបមិត្តភាពកម្ពុជា-វៀតណាម ខាងត្បូងព្រះបរមរាជវាំង។
ក្បួនដង្ហែសាកល្បងដូចគ្នានេះ ក៏នឹងត្រូវធ្វើឡើងម្តងទៀត នៅព្រឹកថ្ងៃសៅរ៍ ទី២៦ ខែមករា ឆ្នាំ២០១៣ ផងដែរ។
ជាការកត់សម្គាល់ សារាចរ ស្តីពី ព្រះរាជពិធីដង្ហែ និងថ្វាយព្រះភ្លើងព្រះបរមសព ព្រះករុណា សម្តេចព្រះ នរោត្តម សីហនុ ចុះថ្ងៃទី៨ ខែមករា ឆ្នាំ២០១៣ ដែលចុះហត្ថលេខាដោយសម្តេចតេជោ នាយករដ្ឋមន្ត្រី ហ៊ុន សែន ក៏បានកំណត់ថា ក្បួនដង្ហែព្រះបរមសព អាចនឹងមានប្រវែងប្រមាណ ១,៥ គីឡូម៉ែត្រ ទៅ ២ គីឡូម៉ែត្រ ដែលត្រូវដង្ហែតាមវិថី និងមហាវិថី ចំងាយ ៦ គីឡូម៉ែត្រ។
ក្នុងពេលដង្ហែក្បួននោះ ផ្លូវសំខាន់ៗ រួមមាន៖ ផ្លូវព្រះនរោត្តម ផ្លូវជួរមាត់ទន្លេ និងផ្លូវវត្តភ្នំ ជាដើម ដែលក្បួនដង្ហែឆ្លងកាត់ ក៏ដូចជាសា លារៀន ផ្សារថ្មី ផ្សារកណ្តាល និងគ្រឹះស្ថានរដ្ឋ ព្រមទាំងគ្រឹះស្ថានឯកជនមួយចំនួន ក៏នឹងត្រូវបិទផងដែរ ដើម្បីសម្រួលកុំឲ្យកកស្ទះចរាចរណ៍នៅថ្ងៃដង្ហែព្រះបរមសព។
ជាមួយនឹងការដង្ហែក្បួនសាកល្បងនោះ ក្រសួងការពារជាតិ ក៏បានប្រកាសថា នៅរសៀលថ្ងៃទី២៥ ខែមករា ឆ្នាំ២០១៣ កងទ័ពក៏នឹងមានការបាញ់សាកល្បងកាំភ្លើងធំ ១០៥ មិលី្លម៉ែត្រ ចំនួន ១០១ ណាត់ ( គ្រាប់ ) សម្រាប់ព្រះរាជពិធីដង្ហែ ព្រះបរមសព ព្រះបរមរតនកោដ្ឋ។ ការបាញ់កាំភ្លើងធំនោះ នឹងត្រូវធ្វើឡើងជាផ្លូវការនៅថ្ងៃដង្ហែព្រះបរមសព សម្តេចព្រះ នរោត្តម សីហនុ នៅព្រឹកថ្ងៃទី១ ខែកុម្ភៈ និងនៅថ្ងៃថ្វាយព្រះភ្លើង នៅរសៀលថ្ងៃទី៤ ខែកុម្ភៈ ឆ្នាំ២០១៣។
សារាចរ បានកំណត់ថា ក្នុងព្រះរាជពិធីដង្ហែ និងថ្វាយព្រះភ្លើងព្រះបរមសព សម្តេចព្រះ នរោត្តម សីហនុ នឹងមានការបាញ់កាំភ្លើងធំ ១០១ ណាត់ ចំនួន ៣ លើក គឺលើកទីមួយនឹងប្រព្រឹត្តទៅនៅថ្ងៃទី១ ខែកុម្ភៈ ឆ្នាំ២០១៣ នៅពេលដែលព្រះបរមសព ត្រូវដង្ហែចេញពីព្រះបរមរាជវាំង និងលើកទីពីរប្រព្រឹត្តទៅនៅពេលដែលព្រះបរមសព ដង្ហែដល់ទីលានវាលព្រះមេរុ។ ការបាញ់លើកទី៣ នឹងប្រព្រឹត្តទៅនៅថ្ងៃទី៤ ខែកុម្ភៈ ឆ្នាំ២០១៣ នៅពេលប្រារព្ធព្រះរាជពិធីថ្វាយព្រះភ្លើង៕ S
ទីវាលព្រះមេរុ សំរាប់តម្កល់ព្រះបញ្ចា ព្រះបរមរតនកោដ្ឋ
ក្បួនសាកល្បង ដង្ហែព្រះបរមសព សម្តេចព្រះ នរោត្តម សីហនុ នាព្រឹកថ្ងៃទី១៩ ខែមករា ឆ្នាំ២០១៣ ( រូបថត៖ ស៊ីវ ចាន់ណា )
