លោក សាពូន មីដាដា បានផ្ដល់បទសម្ភាសន៍ជាមួយ CEN ថា “កំពុងតែរៀបចំចេញនូវវ៉ុលថ្មីមួយទៀត នៅពេលឆាប់ៗនេះ មានឈ្មោះថា Return of Sapoun Midada ជាការតែងនិពន្ធទំនុកច្រៀងថ្មី សាច់ភ្លេងថ្មី ដែលជាការរួមសហការផលិតដោយខ្មែរយើងសុទ្ធសាធ”។
លោកបាន បន្តថា ទំនុកច្រៀងថ្មីរបស់លោក មានការនិពន្ធដោយលោក ខេមរៈ តារា, លោក សុខា ចាន់ផល និងលោក ដូ រ៉េ។ រីឯទំនុកភ្លេង គឺលោក មីដាដា និពន្ធដោយខ្លួនលោកផ្ទាល់តែម្ដង។ ដោយឡែក ការដឹកនាំសម្ដែងសម្រាប់អាល់ប៊ុម Return of Sapoun Midada នេះ មានការចូលរួមពីលោក កែ សីហា និងលោក សុខ ជំនោរ។
លោក មីដាដា បានឲ្យដឹងថា មួយរយៈពេលនេះ លោករវល់គួរសមក្នុងការបំពេញការងារឲ្យផលិតកម្ម ដែលបានបន្តកិច្ចសន្យាថ្មី បន្ទាប់ពីបាត់មុខអស់មួយរយៈ ដោយសារតែបញ្ចប់កុងត្រា និងម្យ៉ាងវិញទៀត លោកចង់មានពេលសម្រាកខ្លះជាមួយក្រុមគ្រួសារ។
លោកបន្តថា នៅក្នុងរយៈពេលនេះដែរ ក៏មានបងប្អូនខ្មែររស់នៅក្រៅប្រទេស មានអូស្ដ្រាលី និងសហរដ្ឋអាមេរិក ពួកគាត់ចង់បានលោកទៅសម្ដែងច្រៀងនៅទីនោះ តែមិនទាន់បានសម្រេចយ៉ាងណានៅឡើយទេ គឺកំពុងស្ថិតនៅក្នុងការសម្រេចចិត្ត។ លោកបញ្ជាក់ថា “ខ្ញុំក៏កំពុងតែមមាញឹកជាមួយផលិតកម្មហង្សមាស ដើម្បីបង្កើតស្នាដៃឲ្យបានល្អប្រសើរឡើងវិញសិន”។
ជា ចុងក្រោយ លោក សាពូន មីដាដា សង្ឃឹមថា អាល់ប៊ុមថ្មីរបស់លោក Return of Sapoun Midada នឹងមានការគាំទ្រច្រើន ពីសំណាក់ទស្សនិកជនទាំងថ្មីទាំងចាស់ ដែលបានពេញចិត្តនឹងសំនៀងរបស់លោក៕
