សម្តេចក្រុមព្រះ យាងទៅបោះឆ្នោត នៅមណ្ឌលវត្តថាន់

ភ្នំពេញៈ ដូចប្រជាពលរដ្ឋខ្មែរផ្សេងទៀតដែរ សម្តេចក្រុមព្រះ នរោត្តម រណឬទ្ធិ ព្រះប្រធានគណបក្សនរោត្តម រណឬទ្ធិ បានយាងទៅបោះឆ្នោតក្រុមប្រឹក្សាឃុំ-សង្កាត់ នាព្រឹកថ្ងៃអាទិត្យ ទី០៣ ខែមិថុនា ឆ្នាំ២០១២ នៅ មណ្ឌលវត្តថាន់ ក្នុងខណ្ឌចំការមន អមដោយវត្តមានប្រជាពលរដ្ឋក្នុងមូលដ្ឋានជាច្រើនរូបផ្សេងទៀត។

ក្រោយពីបានបញ្ចប់ការបោះឆ្នោត សម្តេចក្រុមព្រះ បានមានព្រះបន្ទូលដល់ក្រុមអ្នកកាសែតថា ប្រជាពលរដ្ឋ ដែលបានមកចូលរួម ការបោះឆ្នោតនៅពេលនេះ គឺគ្មានការគំរាមកំហែងណាមួយកើតឡើងនោះឡើយ ជាការ សម្រេចចិត្តតាមឆន្ទៈពិតប្រាកដរបស់ពួកគាត់ ហើយនៅតាមបន្ទប់ នៃការគូសន្លឹកឆ្នោតនីមួយៗ ក៏គ្មានការបំពាក់ កាំមេរ៉ាអ្វីនោះទេ។

សម្តេចក្រុមព្រះ បានមានព្រះបន្ទូល ដោយសង្ឃឹមថា មន្ត្រីរបស់គ.ជ.ប ទាំងអស់ នឹងបំពេញកាតព្វកិច្ចរបស់ខ្លួន ដោយអព្យាក្រិត និងយុត្តិធម៌ សម្រាប់ដំណើរការ នៃការរៀបចំបោះឆ្នោត ក្រុមប្រឹក្សាឃុំ-សង្កាត់នៅពេលនេះ។