រាជធានីភ្នំពេញ ៖
យុវជន២នាក់រងរបួសដួលដេកសន្លប់កើយលើគ្នា
ដោយសារត្រូវរថយន្តមិនស្គាល់ម៉ាកបើកបុក
ហើយបន្ថែមល្បឿនបើករត់គេចខ្លួនបាត់ស្រមោល
កាលពីវេលាម៉ោង៧និង៤៦នាទីយប់ថ្ងៃទី២៧ មេសា តាមផ្លូវលេខ២៧១
កែងផ្លូវលេខ១៨៣ ក្នុងសង្កាត់ទំនប់ទឹក ខណ្ឌចំការមន។
សាក្សីឃើញហេតុការណ៍បានឱ្យដឹងថា
មុនពេលកើតហេតុជនរងគ្រោះជិះម៉ូតូស្មាស់ ពណ៌ខ្មៅ ជិះគ្នា២នាក់
តាមផ្លូវលេខ២៧១ ពីជើងទៅត្បូង ចំណែករថយន្តមិនស្គាល់ម៉ាក
បើកតាមផ្លូវលេខ១៨៣ ពីកើតទៅលិចឆ្ពោះទៅផ្លូវលេខ២៧១ ។
លុះមកដល់ចំណុចកើតហេតុក៏ជ្រុលទៅបុកម៉ូតូបណ្តាលឱ្យដួលរងរបួស
ទាំងពីរនាក់ ។ ជនរងគ្រោះអ្នកបើកបរម៉ូតូរបួសបាក់ជើងឆ្វេង
ឯអ្នកជិះពីក្រោយសន្លប់ស្តូកស្តឹងត្រូវបានរថយន្តសង្គ្រោះដឹកយក
ទៅព្យាបាលនៅមន្ទីរពេទ្យមិត្តភាពខ្មែរ-សូវៀត ។
