ខេត្តកោះកុង ៖ ក្រោយពេលជាប់ពន្ធនាគារ
ដោយសារតែប្រើអំពើហិង្សាដោយចេតនា
ដោយអំណាចនៅខេត្តកោះកុងមក
គេសង្កេតឃើញមានអ្នករត់ការឆ្វេចឆ្វាច នៅរាជធានីភ្នំពេញ
ដើម្បីសុំឱ្យលោកផ្កាយពីរ ប៊ុន សុខា បាននៅក្រៅឃុំ
ឬបានរួចខ្លួន ។
សកម្មភាព «រត់ការ» នោះ
បានលទ្ធផលជាងពាក់កណ្តាលមែន
ពោលគឺអ្នករងគ្រោះស្ទើរស្លាប់ស្ទើររស់៣នាក់ ជាដើមបណ្តឹងនោះ
បានដកពាក្យបណ្តឹង
ព្រោះតែពួកគេបានទទួលប្រាក់ថ្លៃព្យាបាល និងជំងឺចិត្ត
ដែលលេចឮថា ខ្លះបាន៣ពាន់ដុល្លារ ខ្លះទៀតបាន៥ពាន់ដុល្លារ
តាមអ្នកត្រូវធ្ងន់ដៃ និងស្រាល ។ សូម្បីមេធាវីការពារក្តី
ក៏រកកូនក្តីការពារឱ្យមិនបានដែរ ព្រោះកូនក្តីស្ទើរស្លាប់
ស្ទើររស់នោះ ឈប់ធ្វើដើមបណ្តឹងទៅហើយ
គឺអត់មានកូនអុកសម្រាប់កាន់ទេ ។
មានដំណឹងថ្មីទៀតថា
លោកផ្កាយពីរដ៏មានអំណាចនេះ
រង់ចាំតែថ្ងៃដែលត្រូវបានសាលាដំបូងខេត្តកោះកុងចេញភ្លើង
ខៀវឱ្យតែប៉ុណ្ណោះ ហើយលេចឮទៀតថា
ភ្លើងខៀវអាចនឹងត្រូវបើកមិនខានទៀតផង ។ យើងចាំមើល
តើមន្ត្រីមួយណាថ្លើមធំហ៊ានបើកភ្លើងខៀវ...
ប៉ុន្តែនៅរាជធានីភ្នំពេញឯណោះ
អ្នកច្បាប់នៅថ្នាក់លើមួយក្រុមបាននិយាយថា
ចង់អ្នករងគ្រោះដកពាក្យឈប់ប្តឹង ដោយសារបានប្រាក់ក៏ដោយ
ក៏ក្រុមអ្នកប្រព្រឹត្តអំពើដ៏សាហាវព្រៃផ្សៃនោះ
មិនអាចមានសេរីភាពតាមការនឹកចង់បាននោះទេ ។
ក្រុមអ្នកច្បាប់ដដែលនិយាយថា «ទោះបីខំរត់ការ
ដើម្បីបានចេញពីគុក ក៏រត់ទៅ... ប៉ុន្តែសង្ឃឹមតិចណាស់ បានរួចពីគុក
...
បើលោកផ្កាយពីររួមជាមួយអង្គរក្សដ៏កាច
សាហាវនោះ បែរជាអត់មានទោសវិញមែន
ស្រុកយើងប្រាកដជាលែងមានច្បាប់ទៀតហើយ ។
អ្នកដែលបានទស្សនា វីដេអូឃ្លីបរបស់គេហទំព័រកោះសន្តិភាពដែលមានចំនួន៧ម៉ឺននាក់ គ្រប់គ្នាជួយឈឺចាប់ និងរន្ធត់ណាស់ ។ ពួកគេសុំសួរថា តើលោកម្តាយក្មេក និងលោកជំទាវជាភរិយា ដែលឈរក្រពាត់ដៃមើលកូនប្រសា និងលោកប្តីរួមដៃជាមួយអង្គរក្សវាយដំច្រំធាក់មនុស្សតាម អំពើចិត្តបែបនេះ តើចេះឈឺចាប់... ចេះរន្ធត់... ចេះខ្លោចផ្សារក្នុងចិត្ត... អាណិតអាសូរអ្នករងគ្រោះដែរទេ ? កោតក្រពាត់ដៃឈរមើលលោកប្តី លោកកូន ធ្វើទារុណកម្មមនុស្សដូចគ្នា បែបនេះ អត់មានប្រតិកម្មទៅកើត ?
