នៅក្នុងហាង កញ្ញា ជៀក សៅសាយ័ន និង ជៀក ដារី កំពុងតែរវល់ចាត់ចែងខ្ចប់កាដូ និងត្រួតពិនិត្យលើទំនិញដែលនាំចូលត្រៀមសម្រាប់បុណ្យណូអែល និងចូលឆ្នាំសកលខាងមុខនេះ។
ក្នុងទឹកមុខញញឹមពព្រាយ កញ្ញាសាយ័ន ដែលជាបងស្រីវ័យ២៥ឆ្នាំ បាននិយាយថា ថ្ងៃដែលលក់ដាច់បំផុតនោះ គឺឱកាសបុណ្យណូអែលនេះហើយ។ ពេលខ្លះ កញ្ញាមិនបានសម្រាកពេញមួយយប់ ដើម្បីរៀបចំទំនិញរបស់ភ្ញៀវឲ្យបានទាន់ពេលវេលា។ កញ្ញាបន្តថា៖ «ខ្ញុំតែងតែបន្ថែមបុគ្គលិកជាង១០នាក់ ក្នុងរដូវកាលដ៏ពិសេសនេះ ប៉ុន្តែនៅតែមិនអាចធ្វើទាន់តម្រូវការអតិថិជនបានឡើយ»។
ទំនិញមានគុណភាព និងការខ្ចប់តម្លៃថោកសមរម្យ គឺជាសេវាកម្មដែលលេចធ្លោរបស់ណៃស៍។ ទាំង កញ្ញាសាយ័ន និងដារី សុទ្ធតែមានវិធីសាស្រ្ដវេចខ្ចប់កាដូដ៏ជំនាញដើម្បីបំពេញតម្រូវ ចិត្ដអតិថិជន។ កញ្ញា បានបន្ថែមថា៖ «មិនថាវត្ថុប្រភេទណាក៏ដោយ ក៏ពួកយើងអាចខ្ចប់ជាកាដូយ៉ាងស្អាតបែបរ៉ូមែនទិក និងថ្លៃថ្នូរបំផុត ដោយអាស្រ័យលើតម្រូវការរបស់អតិថិជន»។
កញ្ញា ដារី ជាប្អូនស្រីអាយុ២០ឆ្នាំ ធ្វើការងារបណ្ដើរ និងនិយាយបណ្ដើរថា កញ្ញាតែងតែប្រើវត្ថុផ្សេងៗនៅក្នុងហាងដើម្បីច្នៃជាម៉ូដ ប្លែកៗលើកញ្ចប់កាដូ។ ដូច្នេះទើបកាដូរបស់ហាងណៃស៍មើលទៅស្អាតប្លែកពីហាងដទៃ។
កញ្ញា បានលើកឡើងថា៖ «ពួកយើងមិនដែលចម្លងម៉ូដពីនរណាម្នាក់ទេ សូម្បីតែម៉ូដពីទស្សនាវដ្តី ដោយសារយើងចង់បានអ្វីដែលថ្មីសម្រាប់អតិថិជន អ៊ីចឹងហើយបានជាពួកយើងត្រូវតែមានគំនិតច្នៃប្រឌិតប្លែកៗជានិច្ច »។ ជាមួយនឹងបទពិសោធជាង៨ឆ្នាំ បងប្អូនស្រីទាំង២នាក់ បានក្លាយទៅជាអ្នកជំនាញខាងវេចខ្ចប់កាដូ ពីព្រោះពួកគេអាចខ្ចប់កាដូយ៉ាងស្អាតមួយក្នុងពេលតែប្រមាណតែ ២ទៅ៣នាទីប៉ុណ្ណោះ។
ជួនកាល វាពិតជាពិបាកជឿណាស់ថា គ្រាន់តែការខ្ចប់កាដូអាចទទួលបានឈ្នួលដល់ទៅ៤០ដុល្លារ ប៉ុន្តែនេះជាការពិតដែលណៃស៍ហាងលក់វត្ថុអនុស្សាវរីយ៍អាចធ្វើបាន ។ ពួកគេ បានពន្យល់ថា៖ «ការខ្ចប់កាដូ គឺនៅតែមានការពេញនិយមខ្លាំង ដោយសារតែវាបង្ហាញពីសិល្បៈនៃការច្នៃប្រឌិត។ សាមញ្ញតែថ្លៃថ្នូរ គឺជានិមិត្តសញ្ញានៃហាងរបស់យើង»។
បើទោះបីជាមានទីតាំងនៅឆ្ងាយពីហាងដទៃទៀតយ៉ាងណាក៏ដោយ ក៏ណៃស៍ នៅតែមានសមត្ថភាពទាក់ទាញមិត្តយុវវ័យជាច្រើន ជាពិសេសអ្នកមានទ្រព្យធនស្ដុកស្ដម្ភ ពីព្រោះវាមានកន្លែងចតរថយន្ដងាយស្រួល និងទិដ្ឋភាពក្នុងហាងមិនរញ៉េរញ៉ៃ និងអ៊ូអរទេ។
បង្កើនចំនួននៃអ្នកទិញគឺជាគោលដៅនៃបងប្អូនស្រីទាំងពីរ។ ពួកគេ បានអះអាងថា ទាំងកាដូ និងសេវាកម្ម ពួកយើងអាចបានផលចំណេញតែ១ឬក៏២ដុល្លារប៉ុណ្ណោះ ប៉ុន្តែពួកយើងសប្បាយចិត្តនៅពេលដែលអតិថិជនតែងតែមកហាងនេះម្តង ហើយម្តងទៀត៕
