ក្រោយពីផុសចេញនូវវីដេអូឃ្លីបសិចគេកាត់ត ដែលតួឯកស្រីមានមុខស្រដៀងនឹងតារាសម្តែងនាង មាស សម្ផស្ស។ ភ្លាមៗនោះ មាស សម្ផស្ស ក្រៅពីទទួលរងនូវភាពអាម៉ាស់ នាងក៏ទទួលនូវការខឹងសម្បាពីសង្សារជនជាតិកូរ៉េមិនតិចដែរ រហូតកើតដល់ក្តីប្រចណ្ឌមិនអនុញ្ញាតឲ្យនាងចេញថតសម្តែងស្ទើរគ្រប់ សកម្មភាពសិល្បៈទៀតផង។ ទោះបីយ៉ាងណា ការប្រចណ្ឌ និងការរារាំងនោះ មិនស្ថិតក្នុងអារម្មណ៍ប្រុសកូរ៉េយូរអង្វែងឡើយ ហើយពេលនេះតារាសម្តែងរូបនេះកំពុងមានភាពរីករាយនឹងទឹកចិត្តដ៏ ទូលំទូលាយរបស់ប្រុសស្នេហ៍។
ថ្លែងបែបសប្បាយចិត្តតារាសម្តែងរាងតូចច្រឡឹងសាច់សខ្ចីវ័យ២៨ ឆ្នាំ កំពុងជ្រកក្រោមដំបូលតែមួយជាមួយលោក គីម ជាជនជាតិកូរ៉េ ដោយមិនខ្ចីគិតរឿងរៀបអាពាហ៍ពិពាហ៍ នាង មាស សម្ផស្សបាននិយាយថា៖ «ពេលនេះខ្ញុំមានអារម្មណ៍ល្អណាស់បង! ព្រោះថា ប្តីរបស់ខ្ញុំគាត់យល់ដឹងពីការងារអ្នកសិល្បៈច្រើន ហើយគាត់ក៏មិនមានការទើសទាល់នឹងការងារសិល្បៈរបស់ខ្ញុំទៀតដែរ »។
ការរារាំងកន្លងមក ត្រូវបាន មាស សម្ផស្ស លើកឡើងនៅពេលនេះថា៖«បង គីម មានការទើសទាល់នឹងសកម្មភាពខ្ញុំក្នុងសិល្បៈ រហូតឈានដល់កើតក្តី ប្រចណ្ឌនោះ បណ្តាលមកពីវត្តមានសកម្មភាពវីដេអូកាត់ត ហើយគេប្រឌិតថាជារូបខ្ញុំនោះដែរ។ ប៉ុន្តែពេលនេះពពកខ្មៅដែលបាំងបិទចិត្តដ៏ផូរផង់គាត់នោះបានរសាត់ បាត់ហើយ និងក៏ធ្វើឲ្យគាត់ ក្លាយជាមនុស្សមានហេតុផលវិញដែរ។
ជាមួយនឹងអារម្មណ៍ ដែលកំពុងទទួលបានក្តីសុខក្នុងដំណើរសាងសុភមង្គល ជាមួយ ប្រុស កូរ៉េក្រៅតម្រាអាពាហ៍ពិពាហ៍នេះ ត្រូវបាន អ្នកនាង មាស សម្ផស្ស អះអាងថា ពេលនេះ មិនទាន់គិតដល់ចំណុច ដែលកំណត់ពេលវេលាយកកូនទេ ហើយរឿងដឹកដៃគ្នាចូលរោងការក៏ដូចគ្នាដែរ មិនទាន់កំណត់បាន ព្រោះថា រូបនាងកំពុងតែមមាញឹកនឹងការងារសិល្បៈខ្លាំង។
ដោយកំពុងទទួលបានភាពមមាញឹក និងការងារសិល្បៈនោះ អ្នកនាង មាស សម្ផស្ស បានឲ្យដឹងថា៖«នៅពាក់កណ្តាលឆ្នាំ២០១២ ក្រោយពីបង គីម គាត់យល់ដឹងពីសកម្មភាពអ្នកសិល្បៈ ហើយគាត់ជម្រុះភាពប្រចណ្ឌចោលនោះ ខ្ញុំក៏ចាប់ផ្តើមទទួលថតសម្តែងវិញនោះ ឃើញថា ពេលនេះ ការងារសិល្បៈរបស់ខ្ញុំក៏មមាញឹកឡើងវិញដែរ»។
នាងបានបញ្ជាក់ថា៖ «ពេលនេះក្រៅពីថតសម្តែងចម្រៀងកាយវិការខារ៉ាអូខេ ក៏កំពុងដំណើរការថតខ្សែភាពយន្តពីររឿងដំណាលគ្នាដែរ ដែលរឿងមួយនោះថតជិតចប់ហើយ តែដោយឡែករឿងថ្មីដែលទើបចេញថតនោះគឺរឿង«កូនឥតខាន់ស្លា» ដែលជាខ្សែវីដេអូភាគរបស់ស្ថានីយទូរទស្សន៍CTN។
ជាមួយភាពផុសផុលនឹងការងារសម្តែងនៅក្នុងរយៈពេលចុងក្រោយ ក្រោយប្តីឈប់ប្រចណ្ឌនោះ តារារូបនេះ អះអាងទៀតថា៖«ពេលនេះពួកខ្ញុំពីរនាក់ប្តីប្រពន្ធ បានឯកភាពគ្នាបើកដំណើរការក្រុមហ៊ុនលក់គ្រឿងសង្ហារិមដែលមានឈ្មោះ ថា «good kamly» ដែលមានទីតាំងនៅក្បែរស្តុបផ្សារដីហុយ ហើយហាងនេះកំពុងដំណើរការយ៉ាងរលូន៕
